ശരീരഭാരം കുറയ്ക്കാന്‍ കഴിക്കുന്ന മരുന്നുകള്‍, പ്രമേഹ രോഗികളില്‍ ഗുരുതര നേത്രരോഗങ്ങള്‍ക്ക് കാരണമാകാം, പഠനം

വർധിച്ച ശരീരഭാരം ആ​ഗോളതലത്തിൽ ഇപ്പോൾ വലിയൊരു ആരോ​ഗ്യ സങ്കീർണതയായി ഉയർന്നു വന്നിരിക്കുയാണ്. വ്യായാമത്തിനും ഡയറ്റിനും പുറമെ ശരീരഭാരം നിയന്ത്രിക്കുന്നതിന് ചിലർ മരുന്നുകളും പരീക്ഷിക്കാറുണ്ട്. എന്നാൽ അത്തരം ചില മരുന്നുകൾ ​ഗുരുതര കാഴ്ച വൈകര്യങ്ങൾ ഉണ്ടാക്കാമെന്ന് അമേരിക്കൻ മെഡിക്കൽ അസോസിയേഷന്റെ കീഴിലുള്ള മെഡിക്കൽ ജേണൽ JAMA-യിൽ പ്രസിദ്ധീകരിച്ച പുതിയ പഠനത്തിൽ പറയുന്നു.

അമിതവണ്ണം കുറയ്ക്കുന്നതിന് ഒട്ടേറെ പേർ ഉപയോ​ഗിക്കുന്ന ടിർസെപാറ്റൈഡ്, സെമാഗ്ലൂട്ടൈഡ് എന്നിവയടങ്ങിയ മൗൻജാരോ, വെഗോവി എന്നീ പ്രമുഖ മരുന്നുകൾ കഴിക്കുന്ന പ്രമേഹ രോ​ഗികളിൽ ​ഗുരുതര നേത്ര രോ​ഗങ്ങൾ ഉണ്ടാനുള്ള അപകടസാധ്യത കൂടുതലാണെന്നാണ് പഠനത്തില്‍ വ്യക്തമാക്കുന്നു.15 ലക്ഷത്തിലധികം ആളുകളുടെ വിവരങ്ങൾ പരിശോധിച്ചതിന്റെ അടിസ്ഥാനത്തിലാണ് പഠനം പുറത്തുവിട്ടിരിക്കുന്നത്.

സെമാഗ്ലൂറ്റൈഡ്, ടിർസെപറ്റൈഡ് തുടങ്ങിയ വീര്യമേറിയ GLP-1 മരുന്നുകൾ കഴിച്ച രോഗികളെ പഴയ GLP-1 മരുന്നുകൾ ഉൾപ്പെടെയുള്ള മറ്റ് പ്രമേഹ മരുന്നുകൾ കഴിച്ചവരുമായി താരതമ്യം ചെയ്യുമ്പോള്‍ രണ്ട് വർഷം നീണ്ടു നിന്ന പഠനത്തില്‍ രക്തയോട്ടത്തിന്റെ അഭാവം മൂലം കാഴ്ച ശക്തി മുഴുവനായും നഷ്ടപ്പെടുന്ന അപൂർവ നേത്രരോഗമായ നോൺ-ആർട്ടറിറ്റിക് ആന്റീരിയർ ഇസ്കെമിക് ഒപ്റ്റിക് ന്യൂറോപ്പതി (NAOIN), മറ്റ് ഒപ്റ്റിക് നാഡി തകരാറുകൾ എന്നിവയുടെ കോസുകള്‍ ഉയര്‍ന്നതായി കണ്ടെത്തി.

എന്നാല്‍ ഈ മരുന്നുകൾ ഉപയോഗിക്കുന്നവർക്ക് നേത്രാരോഗ്യത്തിൽ ഉണ്ടാകാവുന്ന സങ്കീർണതകളെക്കുറിച്ച് ഇനിയും കൂടുതൽ വിശദമായ പഠനങ്ങൾ ആവശ്യമാണെന്ന് ഗവേഷകര്‍ പറയുന്നു. വിഷയത്തിൽ ദീർഘകാല പഠനങ്ങൾ അനിവാര്യമാണെന്നും അവർ ചൂണ്ടിക്കാട്ടി.