കുളമ്പുള്ള കുതിര, കാണ്ടാമൃഗം പോലുള്ള മൃഗങ്ങള്‍ ചെമ്മരിയാടിന്റെ വലുപ്പമുള്ള വിചിത്ര മൃഗത്തില്‍ നിന്ന് പരിണമിച്ചതാണെന്ന് ഗവേഷകര്‍. പന്നിയും നായയും സങ്കരണം ചെയ്തതുപോലുള്ള ഈ മൃഗം ഇന്ത്യയില്‍ 55 ദശലക്ഷം വര്‍ഷങ്ങള്‍ക്ക് മുമ്പ് കാണപ്പെട്ടിരുന്നതാണെന്ന് ഗവേഷകര്‍ പറയുന്നു.

കാംബെതെറിയം എന്ന ഈ ജീവിയുടെ അവശിഷ്ടങ്ങള്‍ ഗുജറാത്തിലെ ഖനിയില്‍ നിന്ന് കണ്ടെത്തിയതായി ജോണ്‍ ഹോപ്കിന്‍സ് സര്‍വകലാശാലയിലെ ഗവേഷകര്‍ അവകാശപ്പെടുന്നു. 2001 മുതല്‍ നടത്തിയ ഗവേഷണത്തിന്റെ ഫലമാണ് ഈ കണ്ടെത്തല്‍. 2004ല്‍ ഈ മൃഗത്തിന്റെ ഫോസില്‍ കണ്ടെത്തുകയും പിന്നീടുള്ള യാത്രകളില്‍ കൂടുതല്‍ വിവരങ്ങള്‍ ലഭിച്ചെന്നും ഗവേഷകര്‍ പറയുന്നു. ഇന്ത്യയിലെ വിവിധ ഇടങ്ങളില്‍ കണ്ടെത്തിയ 350 ഫോസിലുകള്‍ ഒന്നിച്ചുവച്ചാണ് കാംബെതെറിയത്തിന്റെ അസ്ഥികൂടത്തിന്റെ ഘടന ഉണ്ടാക്കിയെടുത്തത്. 

ഇന്ത്യ ഒരു ദ്വീപ് ആയി നിലനിന്നിരുന്ന കാലത്താണ് ഈ മൃഗം ജീവിച്ചിരുന്നതെന്നാണ് ഗവേഷകര്‍ കരുതുന്നത്. കുതിരകളുടെ ഉത്ഭവം ഇന്ത്യയില്‍ രേഖപ്പെടുത്താന്‍ കഴിയും എന്ന മുപ്പത് വര്‍ഷം മുമ്പത്തെ നിരൂപണത്തെ ശരിവയ്ക്കുന്നതാണ് പുതിയ കണ്ടുപിടുത്തം.