നാല് മിനിറ്റ്, രണ്ട് വിസിൽ; വൈറലായി 'ദം ചായ' റെസിപ്പി

ചായപ്രേമികളായ ഒരുപാട് പേർ നമുക്കുചുറ്റുമുണ്ട്. ഓരോരുത്തരും ചായ ഉണ്ടാക്കുന്ന രീതി വ്യത്യസ്തമാണ്. ചിലർ പാൽ തിളപ്പിച്ച ശേഷം ചായപ്പൊടി ചേർക്കും. മറ്റുചിലർ വെള്ളത്തിൽ പൊടിയിട്ട് തിളപ്പിച്ച ശേഷം പാൽ ഒഴിക്കും. എന്നാൽ 'പ്രഷർ കുക്കർ ദം ചായ' പരീക്ഷിച്ചിട്ടുണ്ടോ?

ചോറും സാമ്പാറും ബിരിയാണിയുമൊക്കെ ശീലിച്ച പ്രഷർ കുക്കറിൽ ചായ ഉണ്ടാക്കാമെന്ന് കേൾക്കുമ്പോൾ പലരും നെറ്റി ചുളിക്കും. ഇൻസ്റ്റഗ്രാമിൽ കുക്കർ ചായ വൈറലായതോടെ സോഷ്യൽ മീഡിയയിൽ ചർച്ചയും സജീവമാണ്.

പ്രഷർകുക്കർ ദം ചായ

കുക്കറിലേക്ക് ഒരു ഗ്ലാസ് പാൽ ഒഴിക്കുക. ഇതിലേക്ക് ഏലയ്ക്ക, ഗ്രാമ്പൂ, ചെറിയ കഷ്ണം കറുവപ്പട്ട, ഇഞ്ചി, കുരുമുളക് എന്നിവ ചേർക്കാം. ഒപ്പം ആവശ്യത്തിന് ചായപ്പൊടിയും ഇട്ട ശേഷം കുക്കർ അടച്ചു വയ്ക്കുക. രണ്ടു വിസിൽ മാത്രം അടിച്ചാൽ മതി. വിസിൽ അടിച്ച ഉടൻ തന്നെ കുക്കറിലെ പ്രഷർ കളഞ്ഞ ശേഷം ചായ അരിച്ചെടുക്കാം. ഇതിലേക്ക് ആവശ്യത്തിന് പഞ്ചസാര കൂടി ചേർത്താൽ 'സ്പെഷ്യൽ കുക്കർ ദം ചായ' തയാർ!

സമയം ലാഭിക്കാൻ പറ്റിയ നല്ലൊരു ഐഡിയ ആണിതെന്നാണ് ചിലരുടെ അഭിപ്രായം, എന്നാൽ ചായയുടെ തനതായ ആ രുചി ഇങ്ങനെ ഉണ്ടാക്കിയാൽ കിട്ടില്ലെന്ന് മറ്റു ചിലരും വാദിക്കുന്നു.