മൂന്നാറിൽ തൊഴിലാളിക്ക് നേരെ പാഞ്ഞടുത്ത് കാട്ടാന; രക്ഷപ്പെട്ടത് തലനാരിഴയ്ക്ക്|VIDEO

മൂന്നാർ: മൂന്നാർ കന്നിമല എസ്റ്റേറ്റിൽ തോട്ടം തൊഴിലാളിക്ക് നേരെ കാട്ടാനയുടെ ആക്രമണശ്രമം. കന്നിമല ലോവർ ഡിവിഷൻ സ്വദേശിയായ പാണ്ടിരാജ് എന്ന തൊഴിലാളിയാണ് അത്ഭുതകരമായി തലനാരിഴയ്ക്ക് കാട്ടാനയുടെ മുന്നിൽ നിന്ന് രക്ഷപ്പെട്ടത്.വെള്ളിയാഴ്ച രാവിലെയായിരുന്നു തോട്ടം മേഖലയെ ഭീതിയിലാഴ്ത്തിയ സംഭവം. രാവിലെ പ്രദേശത്തെ തേയിലത്തോട്ടത്തിലേക്ക് രണ്ട് കാട്ടാനകൾ ഇറങ്ങുകയായിരുന്നു.തൊഴിലാളികൾ താമസിക്കുന്ന ലയത്തിന് പുറത്ത് നിൽക്കുകയായിരുന്ന പാണ്ടിരാജിന്റെ നേർക്കാണ് ആനകളിൽ ഒന്ന് അപ്രതീക്ഷിതമായി പാഞ്ഞടുത്തത്.

തന്നെ ലക്ഷ്യമിട്ട് കാട്ടാനകൾ പാഞ്ഞുവരുന്നത് കണ്ടയുടൻ ജീവൻ രക്ഷിക്കാനായി പാണ്ടിരാജ് സർവ്വശക്തിയുമെടുത്ത് ഓടുകയായിരുന്നു. തൊഴിലാളിയുടെ പിന്നാലെ കാട്ടാനയും കുറച്ചുദൂരം രോഷത്തോടെ പിന്തുടർന്നെങ്കിലും, സമയോചിതമായി ഓടിമാറിയതിനാൽ പാണ്ടിരാജ് പരിക്കേൽക്കാതെ കഷ്ടിച്ച് രക്ഷപ്പെടുകയായിരുന്നു.

ജനവാസമേഖലയോടും എസ്റ്റേറ്റ് ലയങ്ങളോടും ചേർന്ന് നിരന്തരം കാട്ടാനകൾ ഇറങ്ങുന്നത് മൂന്നാറിലെ തോട്ടം തൊഴിലാളികൾക്കിടയിൽ ആശങ്ക സൃഷ്ടിക്കുകയാണ്. തൊഴിലാളികളുടെ ജീവന് സംരക്ഷണം നൽകാൻ വനംവകുപ്പ് ആർആർടി സംഘം പ്രദേശത്ത് കൂടുതൽ നിരീക്ഷണം ഏർപ്പെടുത്തണമെന്ന ആവശ്യം ശക്തമായിട്ടുണ്ട്.

A plantation worker had a miraculous and hairbreadth escape after being charged by wild elephants at Kannimala Estate Lower Division in Munnar on Friday morning