കോഴിക്കോട്: കാരശ്ശേരി സർവീസ് സഹകരണ ബാങ്കിൽ വൻതോതിൽ ഡിജിറ്റൽ കൃത്രിമം നടത്തി സെർവർ ഹാക്ക് ചെയ്തതിലും അനധികൃതമായി വ്യാജ അംഗങ്ങളെ തിരുകിക്കയറ്റിയതിലും പ്രത്യേക അന്വേഷണ സംഘത്തെ നിയോഗിക്കാൻ ശുപാർശ. കോഴിക്കോട് ജില്ലാ ക്രൈംബ്രാഞ്ച് നടത്തിയ പ്രാഥമിക അന്വേഷണത്തിൽ ബാങ്കിന്റെ ഐടി സെർവറുകളിൽ ഗുരുതര സുരക്ഷാവീഴ്ചയും ക്രമക്കേടുകളും സ്ഥിരീകരിച്ചതിനെ തുടർന്നാണ് തീരുമാനം. പ്രത്യേക സംഘത്തെ രൂപീകരിക്കുന്നതിനുള്ള ശുപാർശ ഫയൽ അന്തിമ അനുമതിക്കായി സംസ്ഥാന പൊലീസ് മേധാവിക്ക് കൈമാറി.

ക്രൈംബ്രാഞ്ച് കണ്ടെത്തലുകൾക്ക് പിന്നാലെ ബാങ്കിലെ മുൻ ഉന്നതർക്കെതിരെ മുക്കം പൊലീസ് ക്രിമിനൽ വകുപ്പുകൾ ചുമത്തി കേസെടുത്തിട്ടുണ്ട്. ബാങ്ക് മുൻ ചെയർമാൻ എൻ.കെ. അബ്ദുറഹിമാൻ, മുൻ ജനറൽ മാനേജർ സി. അബ്ദുൽ മുജീബ്, മുൻ ഐടി മേധാവി ബഷീർ അലി, ഇന്റേണൽ ഓഡിറ്റർ ആസിഫ് ഹുസൈൻ, ബാങ്കിന്റെ സാങ്കേതിക പ്രവർത്തനങ്ങൾ നിയന്ത്രിച്ചിരുന്ന കോഴിക്കോട്ടെ സ്വകാര്യ ഐടി സർവീസ് സ്ഥാപനത്തിലെ ജീവനക്കാർ എന്നിവരാണ് കേസിലെ പ്രധാന പ്രതികൾ.

ബാങ്ക് ജീവനക്കാരുടെ ലോഗിൻ വിവരങ്ങളും പാസ്‌വേഡുകളും ദുരുപയോഗം ചെയ്താണ് അനധികൃത വ്യക്തികൾ കേന്ദ്ര സെർവറിലേക്ക് പ്രവേശിച്ചതെന്നാണ് പ്രാഥമിക നിഗമനം. ബാങ്കിന്റെ സാങ്കേതിക സംവിധാനങ്ങൾ കൈകാര്യം ചെയ്തിരുന്ന മൂന്നാം കക്ഷി ഐടി സ്ഥാപനം വഴിയാണ് ബാങ്കിന്റെ ഡാറ്റാബേസിൽ വ്യാജ വോട്ടർമാരെയും വ്യാജ അംഗത്വങ്ങളെയും തിരുകിക്കയറ്റിയത്.

ഭരണസമിതി തിരഞ്ഞെടുപ്പുമായി ബന്ധപ്പെട്ട് ഉയർന്ന രാഷ്ട്രീയ വിവാദമാണ് വൻ ക്രമക്കേട് പുറത്തുകൊണ്ടുവന്നത്. വർഷങ്ങളായി കോൺഗ്രസ് നേതൃത്വത്തിലുള്ള യുഡിഎഫിന്റെ നിയന്ത്രണത്തിലുള്ള ബാങ്കിന്റെ ഭരണസമിതി തിരഞ്ഞെടുപ്പ് അട്ടിമറിക്കാൻ സിപിഎം ശ്രമിച്ചുവെന്ന പ്രതിപക്ഷ ആരോപണത്തോടെയാണ് വിവാദങ്ങൾക്ക് തുടക്കം. വോട്ടർമാരുടെ എണ്ണം കൃത്രിമമായി പെരുപ്പിച്ച് ബാങ്ക് പിടിച്ചെടുക്കാൻ മുൻ ചെയർമാൻ എൻ.കെ. അബ്ദുറഹിമാൻ ഗൂഢാലോചന നടത്തിയെന്ന് കോൺഗ്രസ് നേതൃത്വം ആരോപിച്ചിരുന്നു. തുടർന്ന് ബാങ്കിന്റെ നെല്ലിക്കാപ്പറമ്പ് ശാഖയിൽ ബാങ്കിംഗ് സമയം കഴിഞ്ഞ് അർദ്ധരാത്രിയിൽ 829 'എ' ക്ലാസ് അംഗത്വ അപേക്ഷകൾ സെർവറിലൂടെ തിരക്കിട്ട് പ്രോസസ് ചെയ്തതിന്റെ ആഭ്യന്തര രേഖകൾ ചോർന്നതോടെയാണ് ക്രമക്കേടുകൾ പുറത്തുവന്നത്.