'നെയ്മർ വിരമിച്ചു, അടുത്തത് സിപിഎമ്മിന്റെ വിടവാങ്ങൽ വാർത്തയായിരിക്കും'; പി കെ ശശി

പാലക്കാട്: ഫുട്ബോൾ താരം നെയ്മർ വിരമിച്ച വാർത്ത പുറത്തുവന്നു കഴിഞ്ഞുവെന്നും സിപിഎമ്മിന്റെ വിടവാങ്ങലായിരിക്കും ഇനി വരാനിരിക്കുന്ന അടുത്ത വാർത്തയെന്നും മുൻ സിപിഎം നേതാവും ഡെമോക്രാറ്റിക് മാർക്സിസ്റ്റ് ഫ്രണ്ട് (ഡിഎംഎഫ്) കൺവീനറുമായ പി.കെ. ശശി. ഡിഎംഎഫിന്റെ സംസ്ഥാനതല പ്രവർത്തനങ്ങൾക്ക് തുടക്കം കുറിച്ചുകൊണ്ട് പാലക്കാട്ട് നടന്ന നയപ്രഖ്യാപന കൺവെൻഷനിൽ സംസാരിക്കുകയായിരുന്നു അദ്ദേഹം.

സിഎംപി നേതാവും ഗതാഗതമന്ത്രിയുമായ സിപി ജോൺ സമ്മേളനം ഉദ്ഘാടനം ചെയ്തു. ടികെ ഗോവിന്ദൻ എംഎൽഎ മുഖ്യാതിഥിയായിരുന്നു. കൺവെൻഷന് മുന്നോടിയായി ഡിഎംഎഫ് സംസ്ഥാന വ്യാപകമായി തങ്ങളുടെ സംഘടന വിപുലീകരിക്കുമെന്നും പികെ ശശി അറിയിച്ചു.

സിഎംപിയുമായി ഒരുമിച്ച് സഹകരിച്ച് പ്രവർത്തിക്കാനാണ് ഡിഎംഎഫിന്റെ നിലവിലെ തീരുമാനമെന്നും അദ്ദേഹം വ്യക്തമാക്കി. ഇതോടെ, ഡിഎംഎഫ് സിഎംപിയിൽ ലയിച്ചേക്കുമെന്ന തരത്തിൽ ഉയർന്നുകേട്ടിരുന്ന അഭ്യൂഹങ്ങൾക്ക് വിരാമമായി.

സിപിഎം നേതൃത്വവുമായുള്ള കടുത്ത അഭിപ്രായവ്യത്യാസങ്ങളെയും അച്ചടക്ക നടപടികളെയും തുടർന്ന് പാർട്ടിയിൽ നിന്ന് പുറത്താക്കപ്പെട്ട ശേഷമാണ് പികെ. ശശിയുടെ നേതൃത്വത്തിൽ ഡെമോക്രാറ്റിക് മാർക്സിസ്റ്റ് ഫ്രണ്ട് രൂപീകരിച്ചത്.

യഥാർത്ഥ ഇടതുപക്ഷ ആശയങ്ങളിൽ ഉറച്ചുനിൽക്കുന്ന ശക്തമായൊരു രാഷ്ട്രീയ ബദലാണ് ഡി.എം.എഫ് ലക്ഷ്യമിടുന്നത്. സി.പി.എമ്മിന്റെ തെറ്റായ നയങ്ങളിൽ മനംനൊന്ത് പാർട്ടിയിൽ നിന്ന് വിട്ടുപോന്ന കമ്മ്യൂണിസ്റ്റ് പ്രവർത്തകരെ ഒരൊറ്റ പ്ലാറ്റ്‌ഫോമിൽ അണിനിരത്തുകയെന്നതാണ് സംഘടനയുടെ പ്രധാന ലക്ഷ്യമെന്ന് അദ്ദേഹം മുൻപും വ്യക്തമാക്കിയിരുന്നു.