ഇ.എം.സുരജ എഴുതിയ കവിത: ഇലമുളച്ചി

ഇലകൾക്കൊക്കെ തണുത്തു;

വേരുകൾക്ക്

ചൂടുസഹിക്കാൻ വയ്യ-

ചൂടോ തണുപ്പോ:

അന്നുണ്ടായ കലഹത്തിലാണ്

ചില്ലകൾ

ഇലകളൊക്കെ കൊഴിച്ചത് -

“മിണ്ടാതിരിക്കൂ” “മിണ്ടാതിരിക്കൂ”

എന്ന് രണ്ടു കൂട്ടരോടും

കാറ്റ്;

വീശിവീശിത്തണുപ്പിക്കാനും

ഊതിച്ചൂടാക്കാനും കാറ്റ്-

വഴിവക്കത്ത് വെച്ചിങ്ങനെ

വഴക്കുകൂടാൻ നാണമാവില്ലേ

എന്ന് ചോദിച്ച്

കിളിക്കൂട്ടം

ഒന്നാകെ പറന്നു:

ഇത്തിരിനേരം വട്ടംചുറ്റി നിന്ന

കാറ്റും ആ ചുഴിയിൽ കൂടെപ്പോയി-

ശരിക്കും

തണുപ്പാണോ ചൂടാണോ:

മരം ആലോചിച്ചു,

ഉടലിൽ

തണുപ്പും ചൂടും മാറിമാറി വരുന്നു;

ഉയിരിൽ ചൂടും തണുപ്പും

മാറിമാറി വരുന്നു:

കൊമ്പായ കൊമ്പൊക്കെ,

വേരായ വേരൊക്കെ

മൂർച്ചയെടുത്തു

നില്‍ക്കുകയാണ്:

ഒരു തീരുമാനം പറയണം,

ഇല്ലെങ്കിൽ

ഇപ്പോൾ ഞരമ്പ് മുറിക്കും-

മരമപ്പോൾ

എന്താണ് ചെയ്യുക;

ഓരോ മുറിവിലും

ഇലമുളപ്പിക്കുകയല്ലാതെ!