നടൻ മമ്മൂട്ടിയ്ക്ക് പിറന്നാൾ ആശംസകൾ നേർന്ന് നടൻ ഷമ്മി തിലകൻ. ആഴമായ ദയയുടെയും സ്നേഹത്തിന്റെയും പ്രതിഫലനമായ ഈ പുഞ്ചിരി സ്നേഹത്തിന്റെ പാഠങ്ങൾ പഠിപ്പിക്കുന്നു. ഈ ചിരി എക്കാലവും ഞങ്ങളെ സന്തോഷിപ്പിക്കും. അതുകൊണ്ട്, ഈ ചിരി എന്നെന്നും നിലനിൽക്കാൻ പ്രാർഥിക്കുന്നു.- എന്നാണ് ഷമ്മി തിലകൻ ആശംസകൾ നേർന്ന് ഫെയ്സ്ബുക്കിൽ കുറിച്ചിരിക്കുന്നത്.

മമ്മൂട്ടിയുടെ മനോഹരമായ ഒരു ചിത്രവും ഷമ്മി തിലകൻ പങ്കുവച്ചിട്ടുണ്ട്. 74 -ാം പിറന്നാൾ ആഘോഷിക്കുന്ന മമ്മൂട്ടിക്ക് സിനിമാ രം​ഗത്തെ പ്രമുഖരും ആരാധകരുമടക്കം നിരവധി പേരാണ് ആശംസകൾ അറിയിക്കുന്നത്. കളങ്കാവൽ ആണ് മമ്മൂട്ടിയുടേതായി ഇനി പുറത്തുവരാനുള്ള ചിത്രം.

ഫെയ്സ്ബുക്ക് കുറിപ്പിന്റെ പൂർണരൂപം

പിറന്നാൾ ആശംസകൾ! പ്രിയപ്പെട്ട മമ്മൂക്ക, രോഗവിമുക്തി നേടിക്കൊണ്ടു തന്നെ ഈ പിറന്നാൾ ആഘോഷിക്കാൻ അങ്ങേക്കായതിൽ വലിയ ആശ്വാസവും സന്തോഷവുമുണ്ട്..! ഹൃദയത്തിൻ്റെ നന്മ നിറഞ്ഞുനിൽക്കുന്ന അങ്ങയുടെ നിഷ്കളങ്കമായ ഈ പുഞ്ചിരി കാണാൻ കഴിയുന്നത് അങ്ങേയറ്റം സന്തോഷപ്രദമാണ്.

മദർ തെരേസ പറഞ്ഞതു പോലെ, ചില മുഖങ്ങൾ അങ്ങനെയാണ്... അവരുടെ പുഞ്ചിരിയിൽ ദൈവത്തിന്റെ ദയയും സ്നേഹവും നിറഞ്ഞുനിൽക്കും. ആഴമായ ദയയുടെയും സ്നേഹത്തിന്റെയും പ്രതിഫലനമായ ഈ പുഞ്ചിരി സ്നേഹത്തിന്റെ പാഠങ്ങൾ പഠിപ്പിക്കുന്നു.

ഈ ചിരി എക്കാലവും ഞങ്ങളെ സന്തോഷിപ്പിക്കും. അതുകൊണ്ട്, ഈ ചിരി എന്നെന്നും നിലനിൽക്കാൻ പ്രാർത്ഥിക്കുന്നു. പിറന്നാൾ ആശംസകൾ, പ്രിയപ്പെട്ട മമ്മൂക്ക!