ഹോട്ടൽ ബാൻഡിൽ കീബോർഡിസ്റ്റ്! ഏറ്റവും കൂടുതൽ പാടിയത് തെലുങ്കിൽ; ആരാണ് ഈ മലയാളി ​ഗായകൻ എന്നറിയാമോ?

'ലജ്ജാവതിയെ നിന്റെ കള്ളക്കടക്കണ്ണിൽ...'എന്ന പാട്ടിലൂടെ വ്യത്യസ്തമായ ശബ്ദവും സം​ഗീതവും കൊണ്ട് മലയാള സിനിമയിലെത്തിയ സം​ഗീത സംവിധായകനും ​ഗായകനുമാണ് ജാസി ​ഗിഫ്റ്റ്. അന്ന് വരെ മലയാളികൾ കേട്ട് ശീലിച്ചതിൽ നിന്ന് ഏറെ വ്യത്യസ്തമായിരുന്നു 'ഫോർ ദ് പീപ്പിളി'ലെ ആ ​ഗാനം. ഇന്നും ലജ്ജാവതിയെ എല്ലാവരുടേയും പ്രിയപ്പെട്ട ​ഗാനങ്ങളിലൊന്നാണ്. മലയാളം, തമിഴ്, തെലുങ്ക്, കന്നഡ ഭാഷകളിലും ജാസി ​ഗിഫ്റ്റ് പ്രവർത്തിച്ചു.

തന്റെ മുത്തശ്ശനും അച്ഛനുമൊക്കെ സംഗീതജ്ഞരായിരുന്നുവെന്ന് പറയുകയാണ് ജാസി ​ഗിഫ്റ്റ്. "പപ്പ ഹാർമോണിയം, ഫ്ലൂട്ട് തുടങ്ങിയവയൊക്കെ വായിക്കുമായിരുന്നു. മുത്തശ്ശൻ പള്ളിയിലൊക്കെ പാട്ട് എഴുതുമായിരുന്നു. മ്യൂസിക് അതുകൊണ്ട് ഉള്ളിലുണ്ടെന്നും" ജാസി ​​ഗിഫ്റ്റ് പറഞ്ഞു. ദ് ന്യൂ ഇന്ത്യൻ എക്സ്പ്രസിന്റെ എക്സ്പ്രസ് ഡയലോ​ഗ്സിൽ സംസാരിക്കുകയായിരുന്നു അ​ദ്ദേഹം. താൻ പത്താം ക്ലാസിൽ പഠിക്കുമ്പോൾ ക്ലാസിക്കൽ പിയാനോ ചെയ്ത് തുടങ്ങിയെന്നും അദ്ദേഹം കൂട്ടിച്ചേർത്തു.

"ഹോട്ടൽ ബാൻഡിൽ കീബോർഡിസ്റ്റ് ആയി വർക്ക് ചെയ്താണ് കരിയർ തുടങ്ങുന്നത്. അവിടുത്തെ പാട്ടുകാരൻ മാറിയതിന് ശേഷം ഞാനൊരു പാട്ടുകാരനായി മാറുകയായിരുന്നു. മുത്തശ്ശന് കർണാടിക് സം​ഗീതം അറിയാമായിരുന്നു. അദ്ദേഹം ലൈവ് സോങ്സ് ഒക്കെ എഴുതുന്ന ഒരാൾ കൂടിയായിരുന്നു. ബാൻഡിൽ മെയിൻ പാട്ടുകാരൻ വരാതെയിരുന്ന സമയത്ത് അതിന് പകരം പാടിയാണ് ശരിക്കും ​ഗായകൻ എന്ന നിലയിലേക്ക് മാറുന്നത്. ഇൻസ്ട്രുമെന്റാണ് നമ്മൾ കൈകാര്യം ചെയ്യുന്നതെങ്കിലും പാട്ടിന്റെ ഓവറോൾ കാര്യങ്ങൾ അറിഞ്ഞിരിക്കണം. അങ്ങനെയാണ് പാടി തുടങ്ങുന്നത്".- ജാസി ​ഗിഫ്റ്റ് പറഞ്ഞു.

"ആദ്യമായിട്ട് മലയാളം പാട്ട് പാടുന്നത് ല‍ജ്ജാവതിയെയാണ്. അതിന് മുൻപ് ആൽബങ്ങളിലൊക്കെ ട്രാക്ക് പാടിയിരുന്നു. സഫലത്തിലും ട്രാക്ക് പാടിയിരുന്നു. അന്നൊക്കെ എനിക്ക് മലയാളത്തിലും ഇം​ഗ്ലീഷിലുമൊക്കെ ഉച്ചാരണ പ്രശ്നങ്ങളുണ്ടായിരുന്നു, വാക്കുകളിൽ വ്യക്ത കുറവുണ്ടായിരുന്നു. ഈ പ്രശ്നം കാരണം മലയാളത്തിൽ നിന്ന് മനപൂർവം ഒഴിഞ്ഞു മാറുന്ന ഒരു സ്വഭാവമുണ്ടായിരുന്നു എനിക്ക്. പിന്നെ പാട്ട് കേട്ട് കേട്ടാണ് മലയാളം പാടാൻ തുടങ്ങിയത്". - ജാസി ​ഗിഫ്റ്റ് വ്യക്തമാക്കി. "കംപോസ് ചെയ്യണമെന്ന് എന്നോട് ആദ്യം പറയുന്നത് ബി​ഗ് ബോസ് സാബുവാണ്. യൂണിവേഴ്സിറ്റി കോളജിൽ സാബു എന്റെ ജൂനിയറായിരുന്നു. ഞാൻ കണ്ട ഏറ്റവും വലിയ സെലിബ്രിറ്റിയായിരുന്നു സാബുവും ബാലഭാസ്കറും. രണ്ട് പേരും ഞങ്ങളുടെ കോളജിലായിരുന്നു". - ജാസി ​ഗിഫ്റ്റ് പറഞ്ഞു.

"മലയാളത്തിൽ ഒരു സമയത്ത് പാട്ടുകൾ സ്റ്റീരിയോ ടൈപ്പ് ആയിപ്പോകുന്നുവെന്ന പരാതികളുണ്ടായിരുന്നു. എപ്പോഴും ഡാൻസ് സോങ്സ് ആയിരുന്നല്ലോ ചെയ്തിരുന്നത്. കന്നഡയിലേക്ക് പോയപ്പോഴാണ് വ്യക്തിപരമായി എനിക്ക് മാറ്റം വന്ന് തുടങ്ങിയത്. കന്നഡയിൽ ഞാൻ പാട്ടുകാരനേയല്ല, സം​ഗീത സംവിധായകൻ മാത്രമാണ്. അവിടെയധികം പാട്ടുകൾ പാടിയിട്ടില്ല. അവർക്ക് ഞാൻ പാട്ടുകാരനാണെന്ന കാര്യവും അറിയില്ല. തെലുങ്കിലാണ് ഞാൻ ഏറ്റവും കൂടുതൽ പാട്ടുകൾ പാടിയിരിക്കുന്നത്.

അവിടെ ഞാനൊരു തെലുങ്ക് ​ഗായകനാണ്, മലയാളത്തിൽ ​ഗാനമേള നടത്തുന്നതു പോലെ തെലുങ്കിൽ ​ഗാനമേള നടത്താൻ പറ്റുന്നുണ്ട്. ഈ നാലിടങ്ങളിലും ഏറ്റവും ശ്രദ്ധേയമായ പാട്ട് ലജ്ജാവതിയെ തന്നെയാണ്. കന്നഡയിൽ ഞാൻ ചെല്ലുന്ന സമയത്തെ ടോപ്പ് ​ഗായകരെന്ന് പറയുന്നത് സോനു നി​ഗവും, ശ്രേയ ഘോഷാലുമായിരുന്നു. രണ്ട് പേർക്കും കന്നഡ അറിയില്ല. കന്നഡ എനിക്ക് കുറച്ച് സംസാരിക്കാനൊക്കെ പറ്റും. ഉച്ചാരണ പ്രശ്നം ഏറ്റവും കൂടുതൽ ഉള്ളതും കന്നഡ പാട്ട് പാടുമ്പോഴാണ്.

കാന്താര വന്നതിന് ശേഷം കന്നഡയിൽ സം​ഗീതം വളരെ മാറി. ഒരു പുതിയ തരം​ഗം കന്നഡയിൽ വന്ന് തുടങ്ങി. യഷിന്റെ സിനിമ വന്നതിന് ശേഷവുമൊക്കെ. നമ്മളൊക്കെ പറയുന്നതു പോലെ ഒരു പാൻ ഇന്ത്യൻ സ്വഭാവത്തിലേക്ക് പോകുന്നുണ്ട്. പൊതുവേ മെലഡി ഇഷ്ടപ്പെടുന്ന ആളുകളാണ് കന്നഡയിലുള്ളവർ".- ജാസി ​ഗിഫ്റ്റ് വ്യക്തമാക്കി.

"കൈതപ്രം തിരുമേനിയാണ് എനിക്ക് വേണ്ടി ഏറ്റവും കൂടുതൽ പാട്ട് എഴുതിയിട്ടുള്ളത്. വളരെ കുറച്ച് സമയമേ അദ്ദേഹം എഴുതാൻ എടുക്കാറുള്ളൂ. പത്ത് പതിനഞ്ച് മിനിറ്റിനകം എഴുതി തീർക്കും. ഒരു പാട്ടിന് ഏറ്റവും ചേരുന്ന മീറ്ററിൽ അതിന് കൂടുതൽ ഭം​ഗി വരുന്ന രീതിയിലുള്ള എഴുത്താണ് അദ്ദേഹത്തിന്റേത്".- ജാസി ​ഗിഫ്റ്റ് വ്യക്തമാക്കി.