അനിരുദ്ധ് ഇല്ലാതെ ഇനി ഒരു സിനിമയും ചെയ്യില്ലെന്ന് ലോകേഷ്; 'അപ്പോൾ സാം സി എസിനെ തേച്ചോ?' എന്ന് ആരാധകർ

തമിഴകം മാത്രമല്ല കേരളത്തിലെ സിനിമാ പ്രേക്ഷകരും കാത്തിരിക്കുന്ന ചിത്രങ്ങളിലൊന്നാണ് കൈതി 2. ലോകേഷ് കനകരാജ് യൂണിവേഴ്സിന് തുടക്കമിട്ട ചിത്രം കൂടിയായിരുന്നു കൈതി. കാർത്തി നായകനായെത്തുന്ന ചിത്രത്തിന്റെ രണ്ടാം ഭാ​ഗം അധികം വൈകാതെ പ്രേക്ഷകരിലേക്കെത്തുമെന്ന് സംവിധായകൻ ലോകേഷ് കനകരാജ് പറഞ്ഞിരുന്നു.

കൈതിയുടെ സം​ഗീതവും പ്രേക്ഷകർക്കിടയിൽ ശ്രദ്ധ നേടിയിരുന്നു. സാം സി എസ് ആയിരുന്നു ചിത്രത്തിന്റെ പശ്ചാത്തല സം​ഗീതവും പാട്ടുകളും ഒരുക്കിയത്. എന്നാലിപ്പോൾ രണ്ടാം ഭാ​ഗത്തിൽ സാം സി എസ് ഉണ്ടാകില്ല. പകരം അനിരുദ്ധ് രവിചന്ദർ ആയിരിക്കും സിനിമയ്ക്ക് വേണ്ടി സം​ഗീതം ഒരുക്കുക.

ലോകേഷ് തന്നെയാണ് ഇക്കാര്യം വ്യക്തമാക്കിയത്. സിനിമ എക്സ്പ്രസിന് നൽകിയ അഭിമുഖത്തിലാണ് ലോകേഷ് ഇക്കാര്യം പറഞ്ഞത്. 'അനിരുദ്ധ് ഇല്ലാതെ താൻ ഇനി ഭാവിയിൽ സിനിമകൾ ചെയ്യില്ല. ഇനി അഥവാ അനിരുദ്ധ് ഇൻഡസ്ട്രി വിടുകയാണെങ്കിൽ മാത്രമേ ഞാൻ മറ്റ് ഓപ്ഷനുകൾ നോക്കുകയുള്ളൂ'- ലോകേഷ് പറഞ്ഞു.

ഈ വിഡിയോ വൈറൽ ആയതിന് പിന്നാലെയാണ് ലോകേഷ് ഒരുക്കുന്ന കൈതി 2 വിൽ സാം സി എസ് ഉണ്ടാകില്ലെന്ന് ആരാധകർ ഉറപ്പിച്ചത്. അതേസമയം, കൈതിയ്ക്ക് മുൻപ് ലോകേഷ് രജനികാന്തിനെയും കമൽ ഹാസനെയും വെച്ച് ഒരു ചിത്രം ചെയ്യുമെന്ന വാർത്തകൾ എത്തിയിരുന്നു. നിലവിൽ തമിഴ് സിനിമയിലെ ഏറ്റവും ഹൈപ്പുള്ള സിനിമയാണ് കൈതി 2.

നേരത്തെ ചിത്രം ഈ വർഷം ഷൂട്ട് തുടങ്ങുമെന്ന് റിപ്പോർട്ടുകൾ ഉണ്ടായിരുന്നു. കൂലിയാണ് ലോകേഷിന്റേതായി ഒടുവിൽ തിയറ്ററുകളിലെത്തിയ ചിത്രം. രജനികാന്ത്, ആമിർ ഖാൻ, ഉപേന്ദ്ര, നാ​ഗാർജുന, സൗബിൻ ഷാഹിർ, ശ്രുതി ഹാസൻ, സത്യരാജ് എന്നിവരാണ് കൂലിയിൽ പ്രധാന വേഷങ്ങളിലെത്തിയത്. ചിത്രത്തിന് സമ്മിശ്ര പ്രതികരണമായിരുന്നു തിയറ്ററുകളിൽ നിന്ന് ലഭിച്ചത്.