'ഇത് ഞാനെന്റെ സിനിമയിലേക്ക് എടുക്കുവാ', ദുൽഖറിന്റെ സെൽഫി കണ്ട് പൃഥ്വിരാജ്, ചിരി നിറച്ച് മറുപടി

ലോക്ക്ഡൗൺ കഴിഞ്ഞ് തിരിച്ച് ഷൂട്ടിങ് ലൊക്കേഷനുകളിലേക്ക് മടങ്ങുകയാണ് താരങ്ങൾ. കഴിഞ്ഞ ദിവസം ദുൽഖർ സൽമാനാണ് വീണ്ടും ആക്റ്റീവായതിന്റെ സന്തോഷത്തിലുള്ല ചിത്രം സോഷ്യൽ മീഡിയയിൽ പങ്കുവെച്ചത്. കാറിൽ കൂളിങ് ​ഗ്ലാസ് വച്ചിരിക്കുന്ന സ്റ്റൈലിഷ് സെൽഫിയാണ് താരം പോസ്റ്റ് ചെയ്തത്. വ്യത്യസ്തമായ കോംപോസിഷനിലുള്ള ചിത്രം സോഷ്യൽ മീഡിയയിൽ വൈറലായി. അതിനു പിന്നാലെ ചിത്രത്തിന് പൃഥ്വിരാജ് നൽകിയ കമന്റാണ് ശ്രദ്ധ നേടുന്നത്. 

ദുൽഖറിന്റെ ഫോട്ടോയുടെ കോംപോസിഷൻ അടിച്ചുമാറ്റുമെന്നാണ് പൃഥ്വി പറയുന്നത്. ‘ഈ ചിത്രത്തിന്റെ കോംപോസിഷന്‍ ഞാന്‍ എന്റെ സിനിമയിലേക്ക് എടുക്കുകയാണ്. അതിന് പകരമായി അവിടെ വന്ന് കുറച്ചു കൂടി ബിരിയാണി കഴിച്ചോളാം,’ എന്നായിരുന്നു കമന്റ്. അതിനുപിന്നാലെ പൃഥ്വിക്ക് രസകരമായ മറുപടിയുമായി ദുൽഖറും എത്തി. ‘ഇത് ഒരുമാതിരി, ഹെഡ്‌സ് വന്നാല്‍ നീ ജയിക്കും ടെയ്ല്‍ വന്നാല്‍ ഞാന്‍ തോല്‍ക്കും എന്ന് പറയും പോലെ ആണല്ലോ’ എന്നാണ് താരം കുറിച്ചത്. എന്തായാലും ആരാധകരുടെ ഹൃദയം കീഴടക്കുകയാണ് പ്രിയതാരങ്ങളുടെ സൗഹൃദം.

ദുല്‍ഖറിന്റെ ഫോട്ടോയ്ക്ക് കമന്റുമായി നടി അനുപമ പരമേശ്വരനും എത്തി. ‘എന്താ ആ കോംപോസിഷന്‍, മച്ചാനേ എന്റെ കൂടി ഒരു പടമെടുക്കണേ’, എന്നായിരുന്നു അനുപമയുടെ കമന്റ്. ‘എന്തോ ഭാഗ്യം കൊണ്ട് പറ്റിപ്പോയതാണെന്നായിരുന്നു’  അനുപമയോട് ദുല്‍ഖറിന്റെ മറുപടി. കഴിഞ്ഞ ലോക്ക്ഡൗൺ കാലത്താണ് ദുൽഖറിന്റേയും പൃഥ്വിരാജിന്റേയും സൗഹൃ‌ദം ശക്തമാകുന്നത്. ഇപ്പോൾ ഒന്നിച്ച് ഒത്തുകൂടാനും മറ്റും ഇവർ സമയം കണ്ടെത്താറുണ്ട്.