'അമ്പലത്തിന് മുകളിൽ അല്ലേ, ചെരുപ്പിടാൻ പറ്റില്ലല്ലോ, പൊരിഞ്ഞ വെയിലും! എനിക്ക് നിൽക്കാൻ പോലും പറ്റുന്നില്ല; ഭയ ഭക്തിയോടെയാണ് ദേവിയായി അഭിനയിച്ചത്'

തമിഴ് സിനിമാ ഇൻഡസ്ട്രിയിൽ നിന്നൊരുപാട് ഭക്തി സിനിമകളുണ്ടായിട്ടുണ്ട്. കൂടുതലും അമ്മൻ (ദേവി), മുരുകൻ, ശിവൻ എന്നിവരെ ആസ്പദമാക്കിയുള്ളവയാണ്. ഒന്നിലധികം സിനിമയിൽ ദേവിയായി എത്തിയ നടിമാരിലൊരാളാണ് റോജ. കൊമേഴ്സ്യൽ സിനിമകളുടെ ഭാ​ഗമായി നിന്നപ്പോൾ തന്നെയായിരുന്നു ഭക്തി സിനിമകളിലും നടി അഭിനയിച്ചത്.

ഇപ്പോഴിതാ ദേവിയായി അഭിനയിച്ചപ്പോഴുള്ള അനുഭവം പങ്കുവയ്ക്കുകയാണ് റോജ. ഭയ ഭക്തിയോടെയാണ് താൻ ഭക്തി സിനിമകളിൽ അഭിനയിച്ചിരുന്നത് എന്നാണ് റോജ പറയുന്നത്. സിനിമ വികടന് നൽകിയ അഭിമുഖത്തിൽ സംസാരിക്കുകയായിരുന്നു റോജ. "രാമ നാരായണൻ സാറിന്റെ പടത്തിലാണ് ഞാൻ ആദ്യമായി ദേവിയായി അഭിനയിക്കുന്നത്. ആ പടത്തിൽ അമ്പലത്തിന് മുകളിൽ നിന്നുകൊണ്ടുള്ള ഒരു പാട്ട് സീനുണ്ടായിരുന്നു.

ചെരുപ്പിടാൻ പറ്റില്ലല്ലോ, അമ്പലത്തിന്റെ മുകളിൽ അല്ലേ. നല്ല പൊരിഞ്ഞ വെയിലും. എനിക്ക് നിൽക്കാൻ പോലും പറ്റുന്നില്ല. ഭയങ്കര ബുദ്ധിമുട്ടായിരുന്നു. ആ കിരീടവും വസ്ത്രവുമൊക്കെ ധരിച്ച് നിൽക്കാൻ ഭയങ്കര പാടായിരുന്നു. ഇത്തരം സിനിമകളിൽ ദേവിയായി അഭിനയിക്കുമ്പോൾ നമ്മുടെ ഉള്ളിൽ ആ ദേവിയുള്ള പോലെ ഒരു ഹെവി ഫീലിങ് തോന്നും. ആ സമയത്ത് എനിക്ക് എല്ലാം പേടിയായിരുന്നു.

ഞാൻ ഭയങ്കര ഭക്തിയായിരുന്നു. നോൺ വെജ് ഒന്നും കഴിക്കില്ലായിരുന്നു. മഞ്ഞൾ വെള്ളമൊക്കെ കുടിച്ച് ഭയ ഭക്തിയോടെയാണ് ഞാൻ അഭിനയിച്ചത്. 'പൊട്ടു അമ്മൻ' ചെയ്യുമ്പോൾ അതിൽ നിന്ന് കുറച്ച് വ്യത്യാസം നിങ്ങൾക്ക് കാണാനാകും. ഓരോ സിനിമയും എനിക്ക് വ്യത്യസ്തമാണ്".- റോജ പറഞ്ഞു.

2001 ൽ പുറത്തിറങ്ങിയ 'കോട്ടൈ മാരിയമ്മൻ', 2000 ത്തിൽ പുറത്തിറങ്ങിയ 'പൊട്ടു അമ്മൻ' എന്നീ ചിത്രങ്ങളിലാണ് റോജ ദേവിയായി അഭിനയിച്ചത്. രണ്ട് ചിത്രങ്ങളിലും റോജയ്ക്ക് ഏറെ പ്രശംസകളും ലഭിച്ചിരുന്നു. അതേസമയം അൻപേ ഡയാനയാണ് റോജയുടേതായി റിലീസിനൊരുങ്ങുന്ന ചിത്രം. ജൂലൈ 17 നാണ് ചിത്രം തിയറ്ററുകളിലെത്തുന്നത്.