സഹോദരന്റെ വിവാഹം ആഘോഷമാക്കി സല്‍മാന്‍ ഖാന്‍; നവദമ്പതികൾക്കൊപ്പം ഡാൻസ് കളിച്ച് താരം, വിഡിയോ

ബോളിവുഡ് നടനും സൂപ്പര്‍താരം സല്‍മാന്‍ ഖാന്റെ സഹോദരനുമായ അര്‍ബാസ് ഖാന്റെ വിവാഹമായിരുന്നു ഇന്നലെ. മേക്കപ്പ് ആര്‍ട്ടിസ്റ്റായ ഷുര ഖാനെയാണ് അര്‍ബാസ് വിവാഹം ചെയ്തത്. സഹോദരി അര്‍പിത ഖാന്റെ വസതിയില്‍ വച്ച് നടന്ന വിവാഹത്തില്‍ അടുത്ത ബന്ധുക്കള്‍ മാത്രമാണ് പങ്കെടുത്തത്. ഇപ്പോള്‍ സോഷ്യല്‍ മീഡിയയില്‍ വൈറലാവുന്നത് സല്‍മാന്‍ ഖാന്റെ ഡാന്‍സ് വിഡിയോ ആണ്. 

വിവാഹശേഷമുള്ള പാര്‍ട്ടിയില്‍ നിന്നുള്ളതാണ് ദൃശ്യങ്ങള്‍. നവദമ്പതികള്‍ക്കൊപ്പം ഡാന്‍സ് ചെയ്യുന്ന സല്‍മാന്‍ ഖാനെയാണ് വിഡിയോയില്‍ കാണുന്നത്. തേരെ മസ്ത് മസ്ത് എന്ന ഗാനത്തിനൊപ്പമാണ് സല്‍മാന്റെ ഡാന്‍സ്. അര്‍ബാസിന്റെ ആദ്യ വിവാഹത്തിലെ മകന്‍ അര്‍ഹാനും സല്‍മാനൊപ്പം ഡാന്‍സ് ചെയ്യുന്നത് കാണാം.