'പിന്നീട് എനിക്ക് അങ്ങനെ തോന്നി, 'കാവാലാ'യിൽ തൃപ്തയായിരുന്നില്ല'; തുറന്നു പറഞ്ഞ് തമന്ന

രജനികാന്ത് ചിത്രം 'ജയിലറി'ലെ 'കാവാലാ...' എന്ന പാട്ടിലെ തന്റെ പ്രകടനത്തിൽ താൻ സംതൃപ്തയായിരുന്നില്ലെന്ന് നടി തമന്ന. ഫറ ഖാൻ തന്റെ യൂട്യൂബ് വ്ലോ​ഗിന്റെ ഭാ​ഗമായി തമന്നയുടെ മുംബൈയിലെ വീട്ടിൽ നടത്തിയ ഹോം ടൂറിലാണ് നടി ഇക്കാര്യം തുറന്നുപറഞ്ഞത്.

"കാവാലാ'യുടെ ഷൂട്ടിങ്ങിനിടെ ഞാൻ അല്പം അതൃപ്തയായിരുന്നു, കാരണം എനിക്ക് കുറച്ചു കൂടി നന്നായി ചെയ്യാമായിരുന്നുവെന്ന് എനിക്ക് തോന്നി." തമന്ന പറഞ്ഞു."എപ്പോഴും കുറച്ചുകൂടി നന്നായി ചെയ്യാമായിരുന്നു എന്ന് ചിന്തിക്കുന്ന തരത്തിലുള്ള ആളാണ് നീ," എന്ന് ഇതിനോട് പ്രതികരിച്ചുകൊണ്ട് ഫറാ പറഞ്ഞു.

"പക്ഷേ, 'ആജ് കി രാത്ത്' എന്ന ഗാനത്തിനായി ഞാൻ 15 ദിവസം റിഹേഴ്സൽ ചെയ്തിരുന്നു, അത്രയും സമയം ഞാൻ ചെലവഴിക്കാൻ തന്നെ ആഗ്രഹിച്ചു. ഞാൻ പരിശീലനം സിദ്ധിച്ച ഒരു നർത്തകിയല്ല. കാമറയ്ക്ക് മുന്നിൽ വരുന്നതിന് മുൻപ് കുറേ തവണ റിഹേഴ്സൽ ചെയ്യാൻ എനിക്ക് ഇഷ്ടമാണ്. പ്രാക്ടീസ് ചെയ്യാനും എനിക്ക് ഒരുപാട് ഇഷ്ടമാണ്". - തമന്ന പറഞ്ഞു.

അനിരുദ്ധ് രവിചന്ദർ സം​ഗീതം നൽകിയ 'കാവാലാ'യുടെ വരികൾ എഴുതിയത് അരുൺരാജ കാമരാജ് ആണ്. ശിൽപ റാവു ആണ് ​ഗാനം ആലപിച്ചിരിക്കുന്നത്. ഇത് ഹിറ്റ് ചാർട്ടുകളിൽ ഇടം പിടിക്കുകയും ചെയ്തു.

'വൺ- ഫോഴ്സ് ഓഫ് ദ് ഫോറസ്റ്റ്' എന്ന ചിത്രമാണ് തമന്നയുടെ പുതിയ പ്രൊജക്ട്. സിദ്ധാർഥ് മൽഹോത്രയാണ് ചിത്രത്തിൽ നായകൻ. അതേസമയം നെൽസൺ ദിലീപ് കുമാർ ഒരുക്കുന്ന ജയിലർ 2 അണിയറയിൽ പുരോ​ഗമിക്കുകയാണ്.