'ഈ ദുനിയാവിൽ കോഴിയില്ല'! 'കടുകു വറ'യ്ക്ക് ശേഷം പുത്തൻ റീലുമായി വിദ്യ; 'മലയാളത്തിലേക്ക് വരാനുള്ള പ്ലാൻ ആണോ' എന്ന് ആരാധകർ

സിനിമകളിലേയും മറ്റും രസകരമായ രംഗങ്ങള്‍ റീക്രിയേറ്റ് ചെയ്ത് ആരാധകരെ ചിരിപ്പിക്കുകയാണ് നടി വിദ്യ ബാലന്റെ പ്രധാന പരിപാടിയിപ്പോൾ. മലയാള സിനിമകളിലെ രംഗങ്ങളും വിദ്യ ഇടയ്ക്ക് ഇങ്ങനെ അനുകരിക്കാറുണ്ട്. ഇപ്പോഴിതാ വിദ്യ ബാലന്റെ പുതിയ റീൽ ആണിപ്പോൾ സോഷ്യൽ മീഡിയ കീഴടക്കുന്നത്.

മലയാളം- ഹിന്ദി തർജ്ജമയിലൂടെയാണ് വിദ്യ ആരാധകരെ ചിരിപ്പിക്കുന്നത്. ‘ഇസ് ദുനിയാമെ കോയി നഹി എന്ന ഹിന്ദി വാക്കിന് ഈ ദുനിയാവിൽ കോഴിയില്ല’ എന്ന മലയാളം തർജ്ജമ ചെയ്തുകൊണ്ട് ആരംഭിക്കുന്ന റീൽ വിഡിയോ ഇതിനോടകം തന്നെ സമൂഹമാധ്യമങ്ങളിൽ വൈറലാണ്.

‘കോയി ബാത്ത് നഹീ’ എന്ന വാക്കിന് ‘കോഴി കുളിക്കാറില്ല’, ‘കേരളാ സെ ആനെ വാലാ ഹെ’ എന്ന വാക്കിന് ‘കേരളത്തിൽ ആനവാൽ കിട്ടും’ എന്നിങ്ങനെ ഹിന്ദി വാക്കുകൾക്ക് തെറ്റായ മലയാളം പറഞ്ഞു കൊണ്ടാണ് രസകരമായ വിഡിയോ താരം പങ്കുവെച്ചിരിക്കുന്നത്. ഇതിന് മുൻപും ഹിന്ദി – മലയാളം തർജ്ജമ വിഡിയോ വിദ്യ ബാലൻ പങ്കുവെച്ചിട്ടുണ്ട്. ‌

പഞ്ചാബി ഹൗസിലെ രമണനേയും മൂക്കില്ലാ രാജ്യത്തിലെ രംഗവുമൊക്കെ വിദ്യ ബാലന്‍ അവതരിപ്പിച്ചിട്ടുണ്ട്. ഉര്‍വശിയും മീര ജാസ്മിനും പ്രധാന വേഷങ്ങളിലെത്തിയ അച്ചുവിന്റെ അമ്മ എന്ന ചിത്രത്തിലെ ഉര്‍വശിയുടെ വലിയ ഹിറ്റായ കടുകു വറ കടുകു വറ സീനും വിദ്യ ബാലന്‍ അവതരിപ്പിച്ചിരുന്നു.

പാലക്കാടുകാരിയായ വിദ്യ ബാലൻ മുംബൈയിലാണ് ജനിച്ചു വളർന്നത്. അനീസ് ബസ്മി സംവിധാനം ചെയ്ത് അക്ഷയ് കുമാറും റാഷി ഖന്നയും അഭിനയിക്കുന്ന ചിത്രത്തിലാണ് വിദ്യ ഇപ്പോൾ അഭിനയിക്കുന്നത്.