വിഷ്ണു വിശാലിന്റെ ആക്ഷൻ ക്രൈം ത്രില്ലർ 'ആര്യൻ' ഒടിടിയിലേക്ക്; എവിടെ, എപ്പോൾ കാണാം ?

വിഷ്ണു വിശാൽ നായകനായെത്തിയ തമിഴ് ചിത്രം ആര്യൻ ഒടിടി റിലീസിനൊരുങ്ങുന്നു. ഒക്ടോബർ 31നായിരുന്നു ചിത്രം തിയറ്ററുകളിലെത്തിയത്. വിഷ്ണു വിശാൽ സ്റ്റുഡിയോസിൻ്റെ ബാനറിൽ വിശാൽ തന്നെയാണ് ചിത്രം നിർമിച്ചത്. 'രാക്ഷസൻ' എന്ന ഹിറ്റിനു ശേഷം വീണ്ടും ഒരു ഇൻവസ്റ്റിഗേഷൻ ത്രില്ലറിലൂടെ വിശാൽ നായകനായെത്തുന്നു എന്ന പ്രത്യേകതയും ചിത്രത്തിനുണ്ട്.

'എ പെർഫക്ട് ക്രൈം സ്റ്റോറി' എന്നാണ് ചിത്രത്തിൻ്റെ ടാഗ് ലൈൻ. ആദ്യാവസാനം വരെ പ്രേക്ഷകരെ മുൾമുനയിൽ നിർത്തുന്ന ഒരു ത്രില്ലർ സിനിമ തന്നെയാണിത്. പൊലീസ് ഓഫീസറായാണ് നടൻ സ്ക്രീനിലെത്തുന്നത്. ശ്രദ്ധ ശ്രീനാഥ്, വാണി ഭോജൻ, സെൽവരാഘവൻ, ചന്ദ്രു, ജീവ സുബ്രമണ്യം, എന്നിവരാണ് മറ്റ് പ്രധാന കഥാപാത്രങ്ങൾ.

നെറ്റ്ഫ്ലിക്സാണ് ആര്യൻ്റെ ഒടിടി സ്ട്രീമിങ് അവകാശം സ്വന്തമാക്കിയത്. നവംബർ 28 മുതൽ ചിത്രം സ്ട്രീമിങ് ആരംഭിക്കും. തമിഴ്, ഹിന്ദി, തെലുങ്ക്, കന്നഡ, മലയാളം എന്നീ ഭാഷകളിൽ ചിത്രം പ്രേക്ഷകർക്ക് കാണാനാകും. നവാഗതനായ പ്രവീൺ കെ ആണ് ചിത്രം സംവിധാനം ചെയ്തിരിക്കുന്നത്.

ഗിബ്രാൻ വൈബോധ സംഗീത സംവിധാനം ഒരുക്കിയിരിക്കുന്നത്. ഹരീഷ് കണ്ണൻ ഛായാഗ്രഹണം നിർവഹിച്ചു. ഇരുണ്ട വാനം ആണ് വിഷ്ണു വിശാലിന്റേതായി നിലവിൽ അണിയറയിൽ ഒരുങ്ങുന്ന ചിത്രം. മമിത ബൈജുവാണ് ചിത്രത്തിൽ നായികയായെത്തുന്നത്.