പുറംവേദന അലട്ടുന്നുവോ; പരിഹാരം പറഞ്ഞ് ശിൽപ ഷെട്ടി (വീഡിയോ)

ലോക്ക്ഡൗണിൽ വീട്ടിലിരുന്ന് പലരും ഓഫീസ് ജോലികൾ ചെയ്യുന്നുണ്ട്. ഇക്കൂട്ടരെയെല്ലാം ബാധിക്കുന്ന പ്രധാന പ്രശ്‌നമാണ് പുറംവേദന. ഏറെ നേരത്തെ ഇരിപ്പിന്റെ ഫലമായുണ്ടാവുന്ന പുറം വേദനയ്‌ക്കൊരു പരിഹാരം പറയുകയാണ് ബോളിവുഡ് താരം ശിൽപ ഷെട്ടി. തന്റെ ഇൻസ്റ്റഗ്രാം പേജിൽ പങ്കുവച്ച വീഡിയോയിലൂടെയാണ് പുറം വേദനയ്ക്കു പരിഹാരമാകുന്ന സ്‌ട്രെച്ചിങ് പോസുകൾ ശിൽപ പങ്കുവച്ചിരിക്കുന്നത്. പുറംഭാഗത്തെ മസിലുകളെ ശക്തിപ്പെടുത്തുന്ന സ്‌ട്രെച്ചിങ്ങുകളാണ് ശിൽപ പറഞ്ഞു തരുന്നത്. 

താൻ സ്ഥിരമായി ഇത്തരം സ്‌ട്രെച്ചിങ്ങുകൾ ചെയ്താണ് പുറം വേദനയെ പമ്പകടത്തിയതെന്നും താരം പറയുന്നു. വിവിധ സ്‌ട്രെച്ചിങ് എക്‌സർസൈസുകളുടെ പോസുകളും താരം പങ്കുവച്ചിട്ടുണ്ട്. ഒരു ഉപകരണത്തിന്റെയും സഹായമില്ലാതെ തന്നെ ചെയ്യാവുന്ന പോസുകളാണ് ശിൽപ പോസ്റ്റ് ചെയ്തിരിക്കുന്നത്. 

'ലോക്ക്ഡൗണായതോടെ വീട്ടിൽ ഏറെ ഒഴിവു സമയം കിട്ടുന്നതിനാൽ പലരും ദീർഘനേരം ഇരിക്കുന്നത് ശരീരത്തെ കുഴപ്പത്തിലാക്കുകയാണ്. ഇത് കഠിനമായ പുറം, മസിൽ വേദനകൾക്ക് കാരണമാകുന്നു. ഏറെനേരം നീണ്ടു നിൽക്കുന്ന കഠിനമായ വേദനകൾ അകറ്റാൻ സ്‌ട്രെച്ചിങ്ങുകൾക്കു കഴിയും. ഇത് സ്ഥിരമായി ശീലിച്ചതിലൂടെ എനിക്ക് വലിയ മാറ്റമുണ്ട്. പുറംഭാഗത്തെയും അടിവയറിലെയും മസിലുകളെയും നട്ടെല്ലിന്റെ വഴക്കത്തെയും ബോഡ് പോസ്ചറിനെയുമൊക്കെ ഇത് മെച്ചപ്പെടുത്തുന്നു'- ശിൽപ കുറിക്കുന്നു.