യുഎഇയിലെ പ്രവാസികള്‍ക്ക് നേട്ടം; അബുദാബിയിലെ വാടകയില്‍ പുതിയ മാറ്റം

അബുദാബി: വാര്‍ഷിക വാടകത്തുക ഒറ്റത്തവണയായോ ചെക്കുകളായോ നല്‍കുന്ന പരമ്പരാഗത രീതിക്ക് പകരം മാസതവണകളായി അടയ്ക്കാനുള്ള പുതിയ ഡിജിറ്റല്‍ പേയ്‌മെന്റ് സംവിധാനം അബുദാബിയില്‍ ഒരുങ്ങുന്നു. അഡ്വാന്‍സ്ഡ് റിയല്‍ എസ്റ്റേറ്റ് സര്‍വീസസ് (അഡ്രസ്), യുഎഇ ആസ്ഥാനമായുള്ള പ്രോപ്‌ടെക് കമ്പനി 'കീപ്പര്‍' എന്നിവയുമായി സഹകരിച്ചാണ് ഈ പുതിയ സംവിധാനം അവതരിപ്പിക്കുന്നത്.

അബുദാബിയിലെ പ്രമുഖരായ മൂന്ന് പ്രോപര്‍ട്ടി മാനേജ്മെന്റ് കമ്പനികളുമായി ചേര്‍ന്ന് പദ്ധതിയുടെ പരീക്ഷണാടിസ്ഥാനത്തിലുള്ള പ്രവര്‍ത്തനങ്ങള്‍ ഇതിനകം ആരംഭിച്ചു. 2026-ന്റെ അവസാന പാദത്തോടെ (ഒക്ടോബര്‍-ഡിസംബര്‍) കൂടുതല്‍ ഉടമകളെയും വാടകക്കാരെയും പദ്ധതിയുടെ ഭാഗമാക്കാന്‍ സാധിക്കുമെന്നാണ് കമ്പനി പ്രതീക്ഷിക്കുന്നത്.

'റെന്റ് നൗ, പേ മന്‍ ത്ലി' (ആര്‍എന്‍പിഎം) എന്ന പേരിലുള്ള ഈ സേവനത്തിലൂടെ വാടകക്കാര്‍ക്ക് ഡെബിറ്റ്, ക്രെഡിറ്റ് കാര്‍ഡുകള്‍ വഴി മാസം തോറും വാടക അടയ്ക്കാം. അതേസമയം, കെട്ടിട ഉടമകള്‍ക്ക് കരാര്‍ പ്രകാരമുള്ള തുക കൃത്യമായി ലഭിക്കുകയും ചെയ്യും. ഇതൊരു വായ്പാ സംവിധാനമല്ലാത്തതിനാല്‍ യുഎഇ സെന്‍ട്രല്‍ ബാങ്കിന്റെ കടബാധ്യതാനിരക്ക് (ഡിബിആര്‍) പരിധിയില്‍ വരില്ലെന്ന് അധികൃതര്‍ വ്യക്തമാക്കി. എന്നാല്‍, വാര്‍ഷിക വാടകത്തുകയുടെ 4.75 ശതമാനം മുതല്‍ 12 ശതമാനം വരെ സര്‍വീസ് ചാര്‍ജായി ഈടാക്കും. ഒറിജിനല്‍ പേയ്‌മെന്റ് വ്യവസ്ഥകളും വാടകക്കാരുടെ യോഗ്യതയും അടിസ്ഥാനമാക്കിയായിരിക്കും ഈ നിരക്ക് നിശ്ചയിക്കുക.