ശ്രീനഗര്‍: രണ്ട് വര്‍ഷങ്ങള്‍ക്ക് മുന്‍പാണ് ജമ്മു കശ്മീര്‍ സര്‍വീസ് ബോര്‍ഡിന്റെ തഹസില്‍ദാര്‍ സ്ഥാനത്തേക്കുള്ള പരീക്ഷ എഴുതാന്‍ പശുവിന് ഹാള്‍ ടിക്കറ്റ് ലഭിച്ചത്. എന്നാല്‍ ഇത്തവണ ഹാള്‍ടിക്കറ്റ് ലഭിച്ചത് ഒരു കഴുതക്കാണ്. 'കച്ചൂര്‍ ഖര്‍' എന്ന പേരില്‍ കഴുതയുടെ ചിത്രവുമായി എത്തിയ അപേക്ഷയ്ക്കാണ് ഹാള്‍ടിക്കറ്റ് അനുവദിച്ചത്. 

വരുന്ന ഞായറാഴ്ചയാണ് കഴുതയ്ക്ക് പരീക്ഷ നിശ്ചയിച്ചിരിക്കുന്നത്. സംഭവത്തെ പരിഹസിച്ചുകൊണ്ടുള്ള ട്വീറ്റുകളും ട്രോളുകളുമായി സമൂഹമാധ്യമങ്ങളില്‍ ആഘോഷമാണ്. ഹാള്‍ടിക്കറ്റിന്റെ ചിത്രം സഹിതമാണ് സോഷ്യല്‍ മീഡിയയില്‍ സംഭവം വൈറലാവുന്നത്. ഇത് അധികൃതര്‍ പരിശോധിച്ചിട്ടില്ലെന്നതും ചിത്രങ്ങളില്‍ തന്നെ വ്യക്തമാണ്. 

സംഭവത്തില്‍ അധികൃതര്‍ ഇതുവരെ പ്രതികരിച്ചിട്ടില്ല. 2015ല്‍ സമാനമായ രീതിയില്‍ പശുവിന് ഹാള്‍ ടിക്കറ്റ് അനുവദിച്ചത് ഏറെ വിവാദമായിരുന്നു. 'ബൗണ്‍ പശു' എന്നര്‍ഥമുള്ള കാച്ചിര്‍ ഗാവ് എന്ന പേരിലാണ് പശുവിന് ജമ്മു കാശ്മീര്‍ പ്രഫഷണല്‍ എന്‍ട്രന്‍സ് എക്‌സാമിനേഷന്‍ ബോര്‍ഡ് ഹാള്‍ ടിക്കറ്റ് പുറപ്പെടുവിച്ചത്.