അസമിലും നാടകീയ നീക്കം; നഗാവിലെ തൃണമൂല്‍ കോണ്‍ഗ്രസ് സ്ഥാനാര്‍ത്ഥി പിന്മാറി

ദിസ്പൂര്‍ : പശ്ചിമബംഗാളിലെ നന്ദിഗ്രാമിനു പിന്നാലെ അസമിലും നാടകീയ നീക്കങ്ങള്‍. തൃണമൂല്‍ കോണ്‍ഗ്രസ് സ്ഥാനാര്‍ത്ഥി മത്സരത്തില്‍ നിന്നും പിന്മാറി. നഗാവ് ലോക്‌സഭ ഉപതെരഞ്ഞെടുപ്പിലെ മമത ബാനര്‍ജിയുടെ തൃണമൂല്‍ കോണ്‍ഗ്രസ് സ്ഥാനാര്‍ത്ഥി അബ്ദുള്‍ സലാമാണ് മത്സരത്തില്‍ നിന്നും പിന്മാറിയത്.

പാര്‍ട്ടിയുമായി ബന്ധപ്പെട്ട അവകാശത്തര്‍ക്കത്തെത്തുടര്‍ന്ന്, തൃണമൂല്‍ കോണ്‍ഗ്രസ് പാര്‍ട്ടിയുടെ പേരും തെരഞ്ഞെടുപ്പ് ചിഹ്നമായ പൂവും പുല്ലും കേന്ദ്ര തെരഞ്ഞെടുപ്പ് കമ്മീഷന്‍ മരവിപ്പിച്ചതില്‍ പ്രതിഷേധിച്ചാണ് ഇലക്ഷനില്‍ നിന്നും പിന്മാറുന്നതെന്നാണ് വിശദീകരണം. ഒക്ടോബര്‍ ആറിനാണ് നഗാവില്‍ ഉപതെരഞ്ഞെടുപ്പ് നടക്കുന്നത്.

ഉപതെരഞ്ഞെടുപ്പിനായി പാര്‍ട്ടിക്ക് അനുവദിച്ചിരുന്ന പേരും ചിഹ്നവും താല്‍ക്കാലികമായി മരവിപ്പിച്ചു കൊണ്ടുള്ള തെരഞ്ഞെടുപ്പ് കമ്മീഷന്റെ തീരുമാനം നീതിരഹിതവും ജനാധിപത്യവിരുദ്ധവുമാണെന്ന് അസം ടിഎംസി കണ്‍വീനറും എംഎല്‍എയുമായ ഷെര്‍മാന്‍ അലി അഹമ്മദ് പ്രസ്താവനയില്‍ പറഞ്ഞു. ജനാധിപത്യത്തെ ശ്വാസംമുട്ടിച്ച് ഇല്ലാതാക്കുന്നതാണ് തെരഞ്ഞെടുപ്പ് കമ്മീഷന്റെ നടപടിയെ ശക്തമായി അപലപിക്കുന്നു.

ഇതില്‍ പ്രതിഷേധിച്ച് നഗാവ് മണ്ഡലത്തിലെ മത്സരത്തില്‍ നിന്നും പാര്‍ട്ടി സ്ഥാനാര്‍ത്ഥി പിന്മാറുകയാണ്. പാര്‍ട്ടി ഒറ്റക്കെട്ടായി മമത ബാനര്‍ജിക്കൊപ്പമാണെന്നും ഷെര്‍മാന്‍ അലി അഹമ്മദ് വ്യക്തമാക്കി. സ്ഥാനാര്‍ത്ഥി പിന്മാറിയതിന് പിന്നാലെ, നഗാവ് ഉപതെരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ത്ഥിയെ പിന്തുണയ്ക്കുമെന്ന് മമത ബാനര്‍ജി അറിയിച്ചു. കോണ്‍ഗ്രസ് എംപിയായ പ്രദ്യുത് ബര്‍ദലോയി പാര്‍ട്ടി വിട്ട് ബിജെപിയില്‍ ചേര്‍ന്നതോടെയാണ് നഗാവില്‍ ഉപതെരഞ്ഞെടുപ്പ് വേണ്ടി വന്നത്.