ന്യൂഡല്‍ഹി: കോണ്‍ഗ്രസ് അനുകൂല സന്നദ്ധ സംഘടനയായ രാജീവ് ഗാന്ധി ഫൗണ്ടേഷന്‍ ചൈനീസ് എംബസിയില്‍ നിന്ന് 1.35 കോടി കൈപ്പറ്റിയിട്ടുണ്ടെന്ന് കേന്ദ്ര ആഭ്യന്തരമന്ത്രി അമിത് ഷാ. വിദേശ സംഭാവന നിയന്ത്രണം നിയമം ലംഘിച്ചതിന് രാജീവ്  ഗാന്ധി ഫൗണ്ടേഷന്റെ ലൈസന്‍സ് റദ്ദാക്കിയതിനെ കുറിച്ചുള്ള ചോദ്യങ്ങള്‍ ഒഴിവാക്കാനാണ് പ്രതിപക്ഷം പാര്‍ലമെന്റില്‍ ബഹളം വെച്ചതെന്ന് അമിത് ഷാ പറഞ്ഞു. 

ചോദ്യോത്തര വേളയില്‍ അതിര്‍ത്തിയിലെ ചൈനീസ് പ്രകോപനം ചൂണ്ടിക്കാട്ടി പ്രതിപക്ഷം പ്രതിഷേധം ഉയര്‍ത്തിയിരുന്നു. പ്രതിപക്ഷ ബഹളത്തെ തുടര്‍ന്ന് പാര്‍ലമെന്റിന്റെ ഇരുസഭകളും നിര്‍ത്തിവയ്‌ക്കേണ്ടിവന്നു. തുടര്‍ന്ന് മാധ്യമങ്ങളെ കാണുമ്പോഴാണ് അമിത് ഷാ കോണ്‍ഗ്രസിന് എതിരെ വിമര്‍ശനം  ഉന്നയിച്ചത്.

2005-2007 കാലയളവില്‍ രാജീവ് ഗാന്ധി ഫൗണ്ടേഷന്‍ ചൈനീസ് എംബസിയില്‍ നിന്ന് 1.35കോടി സ്വീകരിച്ചു. തന്നെ പാര്‍ലമെന്റില്‍ സംസാരിക്കാന്‍ അനുവദിച്ചിരുന്നെങ്കില്‍ കോണ്‍ഗ്രസിന്റെ നിയമവിരുദ്ധ പ്രവര്‍ത്തനങ്ങള്‍ തുറന്നുകാണിച്ചേനെയെന്ന് അമിത് ഷാ പറഞ്ഞു.

രാജീവ് ഗാന്ധി ഫൗണ്ടേഷന്റെ എഫ്‌സിആര്‍എ ലൈസന്‍സ് റദ്ദാക്കിയതിനെ കുറിച്ചുള്ള ചോദ്യം ലിസ്റ്റിലുണ്ടെന്ന് അറിഞ്ഞപ്പോള്‍ മുതല്‍ കോണ്‍ഗ്രസ് അംഗങ്ങള്‍ അസ്വസ്ഥരായിരുന്നെന്ന് അമിത് ഷാ ആരോപിച്ചു. 

രാജീവ് ഗാന്ധി ഫൗണ്ടേഷന് സാക്കീര്‍ നായിക്കിന്റെ ഇസ്ലാമിക് റിസര്‍ച്ച് ഫൗണ്ടേഷന്‍ 2011 ജൂലൈ 7ന് 50 ലക്ഷം രൂപ നല്‍കിയിട്ടുണ്ട്. എന്തിനാണ് സാക്കീര്‍ നായിക്ക് ഫൗണ്ടേഷന് പണം നല്‍കിയതെന്ന് അറിയണം. രാജ്യത്തിലെ ജനങ്ങള്‍ ഇതില്‍ വിശദീകരണം അര്‍ഹിക്കുന്നുണ്ട്- അമിത് ഷാ പറഞ്ഞു. ബിജെപി അധികാരത്തില്‍ തുടരുന്നിടത്തോളം,  ഇന്ത്യയുടെ ഒരിഞ്ചുപോലും ആര്‍ക്കും തട്ടിയെടുക്കാന്‍ പറ്റില്ലെന്നും അമിത് ഷാ പറഞ്ഞു. 

ഈ വാര്‍ത്ത കൂടി വായിക്കൂ ഒരു സൈനികനു പോലും ജീവഹാനിയില്ല; ചൈനീസ് സൈന്യത്തെ തുരത്തി; രാജ്‌നാഥ് സിങ് ലോക്‌സഭയില്‍

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ