വീടുകൾ കയറിയിറങ്ങി, 10,000 രൂപയുടെ ഒറ്റരൂപ നാണയങ്ങൾ ശേഖരിച്ച് തെരഞ്ഞെടുപ്പ് ഡിപ്പോസിറ്റ് തുക നൽകി യുവാവ്

ബം​ഗളൂരു: കർണാടക നിയമസഭ തെരഞ്ഞെടുപ്പിൽ മത്സരിക്കുന്നതിന് ഡിപ്പോസിറ്റ് തുകയായ 10,000 രൂപ ഒറ്റരൂപ നാണയമായി നൽകി യാദ്‌ഗിർ മണ്ഡലത്തിലെ സ്വതന്ത്ര സ്ഥാനാർഥി യാങ്കപ്പ. മണ്ഡലത്തിലെ ജനങ്ങളിൽ നിന്നും ശേഖരിച്ച പണമാണിതെന്ന് യാങ്കപ്പ പറഞ്ഞു. 10,000 രൂപവീതമാണ് ഡിപ്പോസിറ്റ് തുകയായി ഓരോ സ്ഥാനാർഥിയും നൽകേണ്ടത്.  രണ്ട് മണിക്കൂറെടുത്താണ് ഉദ്യോ​ഗസ്ഥർ യാങ്കപ്പ നൽകിയ നാണയങ്ങൾ എണ്ണിത്തീർത്തത്. 

പന്ത്രണ്ടാം നൂറ്റാണ്ടിലെ സാമൂഹിക പരിഷ്കർത്താവായ ബസവേശ്വര, കവി കനകദാസ, സ്വാമി വിവേകാനന്ദൻ, ഡോ. ബി ആർ അംബേദ്കർ, ഭരണഘടനയുടെ ആമുഖം തുടങ്ങിയ ചിത്രങ്ങൾ പതിപ്പിച്ച ബാനറും കഴുത്തിൽ തൂക്കിയാണ് യാങ്കപ്പ നാമനിർദേശ പത്രിക സമർപ്പിക്കാൻ എത്തിയത്. 

'ഒരു രൂപ മാത്രമല്ല, നിങ്ങളുടെ ഒരു വോട്ട് എനിക്ക് തരിക, ഞാൻ നിങ്ങളെ ദാരിദ്രത്തിൽ നിന്നും മോചിപ്പിക്കാം' എന്ന് കന്നഡയിൽ ബാനറിന് താഴെ എഴുതിയിരുന്നു. മണ്ഡലത്തിലൂടെ കാൽനടയായി നടന്നാണ് നാണയങ്ങൾ ശേഖരിച്ചതെന്ന് യാങ്കപ്പ പറഞ്ഞു.

കല​ബുറ​ഗിയിൽ നിന്നുള്ള യാങ്കപ്പ ഗുൽബർഗ യൂണിവേഴ്‌സിറ്റിയിൽ നിന്നും ആർട്‌സിൽ ബിരുദം നേടിയിട്ടുണ്ട്. 60,000 രൂപയാണ് ഇദ്ദേഹത്തിന്റെ ആസ്തിയായി നാമനിർദേശ പത്രികയിൽ രേഖപ്പെടുത്തിയിട്ടുള്ളത്. മെയ് 10നാണ് കർണാടക നിയമസഭ തെരഞ്ഞെടുപ്പ്. 

ഈ വാർത്ത കൂടി വായിക്കൂ 

മധ്യപ്രദേശിൽ ചരക്കുതീവണ്ടികൾ കൂട്ടിയിടിച്ച് തീപിടിച്ചു; ലോക്കോപൈലറ്റ് മരിച്ചു, അഞ്ചുപേർക്ക് പരിക്ക്- വീഡിയോ 

 സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ