ക്രിമിനല്‍ പശ്ചാത്തലമുള്ള സ്ഥാനാര്‍ഥിക്ക് ചിഹ്നം കൈവിലങ്ങ്, ഹര്‍ജി തള്ളി സുപ്രീംകോടതി

ന്യൂഡല്‍ഹി: ക്രിമിനല്‍ പശ്ചാത്തലമുള്ള സ്ഥാനാര്‍ത്ഥികള്‍ക്ക് കൈവിലങ്ങ് തെരഞ്ഞെടുപ്പ് ചിഹ്നം വേണമെന്ന പൊതുതാല്‍പര്യ ഹര്‍ജി പരിഗണിക്കാന്‍ വിസമ്മതിച്ച് സുപ്രീംകോടതി. നയപരമായ പ്രശ്‌നമായതിനാല്‍ വിഷയം പരിഗണിക്കാന്‍ ആഗ്രഹിക്കുന്നില്ലെന്ന് ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ ബെഞ്ച് പറഞ്ഞു.

തെരഞ്ഞെടുപ്പ് ചിഹ്നമായി കൈവിലങ്ങ് വെക്കാന്‍ ആവശ്യപ്പെടാനാവില്ലെന്ന് ജസ്റ്റിസുമാരായ ജെ ബി പര്‍ദിവാല, മനോജ് മിശ്ര എന്നിവരടങ്ങിയ ബെഞ്ച് പറഞ്ഞു. വിഷയം പരിഗണിക്കാന്‍ ബെഞ്ച് വിമുഖത പ്രകടിപ്പിച്ചതോടെ അഭിഭാഷകന്‍ കേസ് പിന്‍വലിക്കുകയും ചെയ്തു.

ക്രിമിനല്‍ പശ്ചാത്തലമുള്ള സ്ഥാനാര്‍ത്ഥികള്‍ക്ക് കൈവിലങ്ങിന്റെ തെരഞ്ഞെടുപ്പ് ചിഹ്നം നല്‍കണമെന്ന് ആവശ്യപ്പെട്ട് സുധീര്‍ എന്നയാള്‍ സമര്‍പ്പിച്ച പൊതുതാല്‍പര്യ ഹര്‍ജിയിലാണ് സുപ്രീം കോടതിയുടെ തീരുമാനം.