ചെന്നൈ: തമിഴ്‌നാട്ടില്‍ പന്ത്രണ്ടാം ക്ലാസ് പരീക്ഷയില്‍ 99.79 ശതമാനം വിജയം. 8,18,129 വിദ്യാര്‍ഥികളാണ് പരീക്ഷ എഴുതാന്‍ രജിസ്റ്റര്‍ ചെയ്തത്. ഇതില്‍ 8,16,473 വിദ്യാര്‍ഥികള്‍ വിജയിച്ചതായി ഡയറക്ടറേറ്റ് ഓഫ് ഗവണ്‍മെന്റ് എക്‌സാമ്‌സ് അറിയിച്ചു. 1656 വിദ്യാര്‍ഥികള്‍ പരീക്ഷ എഴുതിയില്ല.

കോവിഡ് രണ്ടാം തരംഗത്തിന്റെ പശ്ചാത്തലത്തില്‍ പന്ത്രണ്ടാം ക്ലാസ് പരീക്ഷ സംസ്ഥാന സര്‍ക്കാര്‍ റദ്ദാക്കിയിരുന്നു. തുടര്‍ന്ന് പ്രത്യേക മൂല്യനിര്‍ണയ ഫോര്‍മുല തയ്യാറാക്കിയാണ് ഫലം പ്രഖ്യാപിച്ചത്. പത്താം ക്ലാസ് ബോര്‍ഡ് പരീക്ഷയ്ക്ക് 50 ശതമാനം വെയിറ്റേജ് നല്‍കി. മൂന്ന് വിഷയങ്ങളുടെ മാര്‍ക്കിന്റെ ശരാശരിയാണ് ഇതിനായി പരിഗണിച്ചത്. പ്ലസ് വണ്‍ പരീക്ഷയ്ക്ക് 20 ശതമാനം വെയ്‌റ്റേജാണ് നല്‍കിയത്. പന്ത്രണ്ടാം ക്ലാസിലെ പ്രാക്ടിക്കല്‍, ഇന്റേണല്‍ പരീക്ഷയുടെ മാര്‍ക്കുകളും മൂല്യനിര്‍ണയത്തിനായി പരിഗണിച്ചിട്ടുണ്ട്.