ലക്നൗ​: ചികിത്സയ്ക്ക് പണമില്ലാത്തതിനെത്തുടർന്ന് മൂന്നുവയസുകാരി ആശുപത്രിക്ക്​ പുറത്ത്​ പുഴുവരിച്ച്​ മരിച്ചു. യുപിയിലെ പ്രയാഗ്​രാജിലെ യുനൈറ്റഡ് മെഡിസിറ്റി ആശുപത്രിയിലാണ്​ സംഭവം. ബില്ലുകൾ അടയ്ക്കാൻ കഴിയാത്തതിനാൽ ശസ്ത്രക്രിയാ മുറിവുകൾ തുറന്നിട്ടതുമൂലം​ അണുബാധ ഉണ്ടായതാണ് കുട്ടിയുടെ മരണത്തിനു കാരണമെന്നാണ് റിപ്പോർട്ടുകൾ. 

ചികിത്സക്കായി അഞ്ച്​ ലക്ഷം രൂപ ആശുപത്രിക്കാർ ആവശ്യപ്പെട്ടതെന്നും പണം നൽകാൻ കഴിയാതെവന്നപ്പോൾ ശസ്ത്രക്രിയാ മുറിവുകൾ തുന്നിക്കെട്ടാതെ കുട്ടിയെ ഡിസ്ചാർജ് ചെയ്യുകയായിരുന്നെന്നും മാതാപിതാക്കൾ പറഞ്ഞു. ഫെബ്രുവരി 16നാണ് പെൺകുട്ടിയെ സ്വകാര്യ ആശുപത്രിയിൽ പ്രവേശിപ്പിച്ചതെന്നും തുടർന്ന്​ ഓപ്പറേഷന് വിധേയമാക്കിയെന്നും പ്രാഥമിക അന്വേഷണത്തിനുശേഷം പൊലീസ് പറഞ്ഞു. സംഭവം വിവാദമായതിനെതുടർന്ന്​ കുട്ടിയുടെ മരണത്തെക്കുറിച്ച് അന്വേഷിക്കാൻ ദേശീയ ശിശു അവകാശ സംഘടന രംഗത്തെത്തി.