കോവിഡിനെ മറികടക്കാൻ യോഗയും പ്രാണായാമവും, ദിവസവും ശീലമാക്കൂ എന്ന് രാഷ്​ട്രപതി 

ന്യൂഡൽഹി: കോവിഡിനെ മറികടക്കാൻ യോഗയും പ്രാണായാമവും ദിനചര്യയുടെ ഭാ​ഗമാക്കാൻ ഉപദേശിച്ച് രാഷ്​ട്രപതി രാംനാഥ്​ കോവിന്ദ്​. ഇതുവഴി മഹാമാരി മൂലമുണ്ടായ ദുരന്തത്തെ മറികടക്കാൻ കഴിയുന്നതിനൊപ്പം ആരോഗ്യമുള്ള രാജ്യത്തെ വാർത്തെടുക്കാനും സാധിക്കുമെന്ന് അദ്ദേഹം ട്വിറ്ററിൽ കുറിച്ചു. 

''നമുക്കെല്ലാവർക്കും യോഗയും പ്രാണായാമവും ദിനചര്യയുടെ ഭാഗമാക്കാം. സമൂഹത്തിലേക്ക്​ ഇത്​ പ്രചരിപ്പിക്കുകയും ചെയ്യാം. ഈ മഹാമാരി മൂലമുണ്ടായ ദുരന്തത്തെ മറികടക്കാൻ നമുക്കിത്​ കൊണ്ട്​ മാത്രമേ കഴിയൂ. കൂടാതെ ഇതുവഴി നമുക്ക്​ ആരോഗ്യമുള്ള രാജ്യത്തെ വാർത്തെടുക്കാനും കഴിയും'', പ്രസിഡൻറ്​ ഓഫ്​ ഇന്ത്യയുടെ ഔദ്യോഗിക ട്വിറ്റർ പേജിൽ അദ്ദേഹം കുറിച്ചു. 

വാക്​സിനേഷന്റെ പ്രാധാന്യത്തെക്കുറിച്ചു മുമ്പൊരു ട്വീറ്റിൽ അദ്ദേഹം ഓർമ്മിപ്പിച്ചിരുന്നു.  വാക്​സിനെടുക്കൽ മാത്രമല്ല, മറ്റുള്ളവരെ വാക്​സിനേഷനായി പ്രചോദിപ്പിക്കുന്നതും ഓരോരുത്തരുടെയും കടമയാണെന്നായിരുന്നു രാഷ്ട്രപതിയുടെ ട്വീറ്റ്.