പനി ബാധിതരെ എല്ലാവരെയും കോവിഡ് പരിശോധനയ്ക്ക് വിധേയരാക്കും

ന്യൂഡല്‍ഹി : രാജ്യത്ത് പനി ബാധിച്ച് ആശുപത്രികളില്‍ എത്തുന്ന എല്ലാവരെയും കോവിഡ് പരിശോധനയ്ക്ക് വിധേയരാക്കാന്‍ കേന്ദ്ര മന്ത്രിതല സമിതിയുടെ ശുപാര്‍ശ. വിദേശയാത്രാ ചരിത്രമോ, കോവിഡ് രോഗീ സമ്പര്‍ക്കമോ ഇല്ലാത്തവരെയും പരിശോധനയ്ക്ക് വിധേയരാക്കും. ഇതു സംബന്ധിച്ച് നിര്‍ദേശം ഉടന്‍ പുറത്തിറങ്ങും.

കോവിഡ് സാമൂഹിക വ്യാപനം എന്നതില്‍ സംശയങ്ങള്‍ നിലനില്‍ക്കുന്ന സാഹചര്യത്തിലാണ് ഈ നിര്‍ദേശം. കേന്ദ്രപ്രതിരോധമന്ത്രി രാജ്‌നാഥ് സിങിന്റെ അധ്യക്ഷതയില്‍ ചേര്‍ന്ന മന്ത്രിതല സമിതിയാണ് ഈ നിര്‍ദേശം മുന്നോട്ടുവെച്ചത്.

രാജ്യത്ത് കോവിഡ് ബാധിച്ചവരുടെ എണ്ണം 14,000 കടന്നു. ആകെ രോഗബാധിതരുടെ എണ്ണം 14,378 ആയി. മരണം സംഖ്യ 480 ആയി. കഴിഞ്ഞ ദിവസം 991 പേര്‍ക്കാണ് പുതുതായി രോഗം സ്ഥിരീകരിച്ചത്. 43 പേരും മരിച്ചു. മഹാരാഷ്ട്രയില്‍ മരണം 210 ആയി. രോഗബാധിതരുടെ എണ്ണം 3323 ആയിട്ടുണ്ട്.