പ്രസാദത്തിൽ നിന്ന് ഭക്ഷ്യ വിഷബാധ; 16കാരൻ മരിച്ചു

ബം​ഗളൂരു: തുമകുരു പാവ​ഗഡ താലൂക്കിലെ വീരഭദ്രേശ്വര ക്ഷേത്രത്തിൽ വിതരണം ചെയ്ത പ്രസാദത്തിൽ നിന്ന് ഭക്ഷ്യ വിഷബാധയേറ്റ് 16കാരൻ മരിച്ചു. സിറ സ്വദേശി വീരഭദ്രനാണ് മരിച്ചത്. 19 പേർ സിറയിലേയും ബം​ഗളൂരുവിലേയും ആശുപത്രികളിൽ ചികിത്സയിലാണ്. 

പ്രസാദമുണ്ടാക്കാൻ ഉപയോ​ഗിച്ച വെള്ളത്തിൽ മാലിന്യം കലർന്നതാണ് അപകട കാരണമെന്നാണ് പ്രാഥമിക നി​ഗമനം. സംഭവത്തിൽ മുഖ്യമന്ത്രി എച്ഡി കുമാര സ്വാമി ഡെപ്യൂട്ടി കമ്മീഷണറോട് റിപ്പോർട്ട് ആവശ്യപ്പെട്ടു. 

തിങ്കളാഴ്ച ക്ഷേത്രത്തിൽ നടന്ന പ്രത്യേക പൂജയ്ക്ക് ശേഷമാണ് പ്രസാദം വിതരണം ചെയ്തത്. ബം​ഗളൂരു ഉൾപ്പെടെ മറ്റ് ജില്ലകളിൽ നിന്ന് ഒട്ടേറെപ്പേർ ക്ഷേത്രത്തിൽ എത്തിയിരുന്നു. 

പൂജ കഴിഞ്ഞ് മടങ്ങിയവർക്ക് ഛർദ്ദിയും വയറിളക്കവും അനുഭവപ്പെട്ടത്. തുടർന്ന് 20ഓളം പേർ വിവിധ ​ആശുപത്രികളിൽ ചികിത്സ തേടി. മരുന്നകളോട് പ്രതികരിക്കാതെ ​ഗുരുതരാവസ്ഥയിലായ വീരഭദ്രൻ രാവിലെയാണ് മരിച്ചത്. 

കഴിഞ്ഞ വർഷം ചാമരാജ ന​ഗർ ജില്ലയിലെ ക്ഷേത്രത്തിൽ നിന്ന് പ്രസാദം കഴിച്ച 17 പേർ മരിച്ചിരുന്നു.