കൊച്ചി: നടിയെ അക്രമിച്ച കേസില്‍ അറസ്റ്റിലായി ആലുവ ജയിലില്‍ കഴിയുന്ന ദിലീപിനെ സന്ദര്‍ശിക്കാന്‍ പ്രമുഖ താരങ്ങള്‍ എത്തി. സംവിധായകന്‍ രഞ്ജിത്ത്, നടന്‍മാരായ ഹരിശ്രീ അശോകന്‍, കലാഭവന്‍ ഷാജോണ്‍ തുടങ്ങിയ താരങ്ങള്‍ ജയിലിലെത്തി ദിലീപുമായി സംസാരിച്ചു.

രഞ്ജിത്തിനും ഹരിശ്രീ അശോകനും പത്ത് മിനുട്ട് വീതം സംസാരിക്കാന്‍ അനുമതി നല്‍കി. കൂടിക്കാഴ്ചയെ കുറിച്ച് ഇരുവരും പ്രതികരിച്ചില്ല. അതേസമയം, കുറച്ച് സമയം മാത്രം ലഭിച്ചതുകൊണ്ട് കൂടുതല്‍ സംസാരിക്കാന്‍ സാധിച്ചില്ലെന്ന് ഷാജോണ്‍ വ്യക്തമാക്കി.

കഴിഞ്ഞ ദിവസം പിതാവിന്റെ ശ്രാദ്ധത്തില്‍ പങ്കെടുക്കാന്‍ അങ്കമാലി മജിസ്‌ട്രേറ്റ് കോടതി അനുമതി നല്‍കിയതിനു ശേഷം ദിലീപിന്റെ ഭാര്യ കാവ്യയും മകള്‍ മീനാക്ഷിയും കാവ്യയുടെ പിതാവ് മാധവനും ജയിലില്‍ വന്നു താരത്തെ കണ്ടിരുന്നു. ദിലീപിന്റെ ആലുവയിലെ വീട്ടിലും ആലുവ മണപ്പുറത്തുമായി നടക്കുന്ന പിതാവിന്റെ ശ്രാദ്ധം ചടങ്ങിനായി രണ്ടു മണിക്കൂറാണ് കോടതി ദിലീപിനു അനുവദിച്ചിരിക്കുന്നത്. നാദിര്‍ഷ, ആല്‍വിന്‍ ആന്റണി എന്നിവരും ദിലീപിനെ സന്ദര്‍ശിച്ചിരുന്നു.