വ്യാജ മദ്യ നിർമാണം; 130 ലിറ്റർ വാഷും ഉപകരണങ്ങളും പിടിച്ചെടുത്തു

മലപ്പുറം: തെരഞ്ഞെടുപ്പിനോടനുബന്ധിച്ച് വ്യാജമദ്യ നിർമാണവും വിൽപനയും നിയന്ത്രിക്കാൻ ലക്ഷ്യമിട്ട് എക്‌സൈസ് സംഘം നടത്തിയ പ്രത്യേക പരിശോധനയിൽ വണ്ടൂരിൽ 130 ലിറ്റർ വാഷും ഉപകരണങ്ങളും പിടിച്ചെടുത്തു. സംഭവവുമായി ബന്ധപ്പെട്ട് വണ്ടൂർ കൂരാട് സ്വദേശി അറസ്റ്റിലായി. മിച്ചഭൂമി പ്രദേശത്തെ കുത്തന്നൂർ മണി (50) ആണ് പിടിയിലായത്. 

കാളികാവ് റെയിഞ്ച് എക്‌സൈസ് സംഘമാണ് പരിശോധന നടത്തിയത്. കാളികാവ് റെയിഞ്ച് എക്‌സൈസ് ഇൻസ്‌പെക്ടർ എംഒ വിനോദിന് ലഭിച്ച രഹസ്യ വിവരത്തിന്റ അടിസ്ഥാനത്തിൽ നടത്തിയ പരിശോധനയിലാണ് ചാരായം പിടികൂടിയത്. 

130 ലിറ്റർ വാഷും 20 ലിറ്റർ ചാരായവും രണ്ടര ലിറ്റർ ഇന്ത്യൻ നിർമ്മിത വിദേശ മദ്യവും ഇവിടെ നിന്ന് കണ്ടെടുത്തു. ചാരായം വാറ്റാൻ ഉപയോഗിക്കുന്ന ഉപകരണങ്ങളും സംഭവ സ്ഥലത്ത് നിന്ന് പിടിച്ചെടുത്തിട്ടുണ്ട്.