കരിപ്പൂരിലും നെടുമ്പാശ്ശേരിയിലുമായി 2 വിമാന സര്‍വീസുകള്‍ റദ്ദാക്കി, യാത്രക്കാരുടെ പ്രതിഷേധം ശക്തം

കോഴിക്കോട്: സാങ്കേതിക തകരാറും മറ്റ് തടസ്സങ്ങളെയും തുടര്‍ന്ന് സംസ്ഥാനത്തെ പ്രധാന വിമാനത്താവളങ്ങളില്‍ നിന്നുള്ള അന്താരാഷ്ട്ര സര്‍വീസുകള്‍ റദ്ദാക്കി. കരിപ്പൂരിലും നെടുമ്പാശ്ശേരിയിലുമാണ് അന്താരാഷ്ട്ര വിമാന സര്‍വീസുകള്‍ മുടങ്ങിയത്. വിമാനങ്ങള്‍ റദ്ദാക്കിയ നടപടിക്കെതിരെ യാത്രക്കാര്‍ വിമാനത്താവളങ്ങളില്‍ ശക്തമായ പ്രതിഷേധമുയര്‍ത്തി.

കരിപ്പൂര്‍ വിമാനത്താവളത്തില്‍ നിന്ന് വൈകിട്ട് 6.40-ന് ദുബായിലേക്ക് പുറപ്പെടേണ്ടിയിരുന്ന സ്‌പൈസ് ജെറ്റ് വിമാനമാണ് കൃത്യമായ കാരണം വ്യക്തമാക്കാതെ അവസാന നിമിഷം റദ്ദാക്കിയത്. കഴിഞ്ഞ ദിവസവും ഇതേ സര്‍വീസ് റദ്ദാക്കിയിരുന്നു. സര്‍വീസ് റദ്ദാക്കിയതില്‍ യാത്രക്കാര്‍ വിമാനത്താവളത്തില്‍ വലിയ പ്രതിഷേധമുയര്‍ത്തി. കൃത്യമായ കാരണം വ്യക്തമാക്കാതെ സര്‍വീസ് ഉപേക്ഷിച്ചതിലാണ് യാത്രക്കാര്‍ പ്രതിഷേധിച്ചത്.

കൊച്ചി നെടുമ്പാശ്ശേരി വിമാനത്താവളത്തില്‍ നിന്ന് പുലര്‍ച്ചെ 4.15 ന് ദോഹയിലേക്ക് പോകേണ്ടിയിരുന്ന ഖത്തര്‍ എയര്‍വേയ്‌സ് വിമാനവും റദ്ദാക്കി. ഹൈഡ്രോളിക് സംവിധാനത്തിലെ തകരാറിനെ തുടര്‍ന്നാണ് സര്‍വീസ് റദ്ദാക്കിയത്. വിമാനം മുടങ്ങിയതില്‍ പ്രതിഷേധിച്ച യാത്രക്കാരെ പിന്നീട് വിമാനക്കമ്പനി അധികൃതര്‍ ഇടപെട്ട് വിവിധ ഹോട്ടലുകളിലേക്ക് മാറ്റിപ്പാര്‍പ്പിച്ചു.