വിപ്പ് ലംഘിച്ച് യുഡിഎഫിന് വോട്ട്; കുമരകത്ത് ബിജെപി അംഗങ്ങള്‍ക്കെതിരെ നടപടി

കോട്ടയം: ഗ്രാമപഞ്ചായത്ത് പ്രസിഡന്റ് തെരഞ്ഞെടുപ്പില്‍ പാര്‍ട്ടി വിപ്പ് ലംഘിച്ച് യുഡിഎഫിന് വോട്ടു ചെയ്ത സംഭവത്തില്‍ കുമരകം ബിജെപിയില്‍ നടപടി. വിപ്പു ലംഘിച്ച മൂന്ന് അംഗങ്ങളെ പാര്‍ട്ടിയുടെ പ്രാഥമിക അംഗത്വത്തില്‍ നിന്നും പുറത്താക്കി.

പി കെ സേതു, സുനീത് വി കെ, നീതു റെജി എന്നിവര്‍ക്കെതിരെയാണ് പാര്‍ട്ടി സംഘടനാ നടപടി സ്വീകരിച്ചിട്ടുള്ളത്. വിപ്പ് സംഘനത്തിനാണ് നടപടി. കുമരകം പഞ്ചായത്തില്‍ ബിജെപി സഹായത്തോടെ യുഡിഎഫ് പിന്തുണച്ച സ്വതന്ത്രന്‍ പ്രസിഡന്റായി തെരഞ്ഞെടുക്കപ്പെട്ടിരുന്നു.

മുന്‍ സിപിഎം പ്രവര്‍ത്തകനും ഇപ്പോള്‍ സ്വതന്ത്രനുമായ എ പി ഗോപിയാണ് കുമരകത്ത് പ്രസിഡന്റായത്. അംഗങ്ങള്‍ക്ക് വാട്‌സാപ്പില്‍ വിപ്പ് അയച്ചിരുന്നു. വിപ്പ് ലംഘിച്ചാണ് വോട്ടിങ് നടന്നതെന്നും ബന്ധത്തെ അംഗീകരിക്കില്ലെന്നും ബിജെപി വെസ്റ്റ് ജില്ലാ പ്രസിഡന്റ് ലിജിന്‍ ലാല്‍ വ്യക്തമാക്കിയിരുന്നു.