റേഷൻ: ഈ മാസം അധിക മണ്ണെണ്ണ നൽകും  

തിരുവനന്തപുരം: റേഷൻകടകൾ വഴി ഈ മാസം അധിക മണ്ണെണ്ണ നൽകും. സംസ്ഥാനത്തെ അന്ത്യോദയ അന്നയോജന (മഞ്ഞ) റേഷൻ കാർഡ് ഉടമകൾക്ക് ഒരു ലീറ്ററും മറ്റു കാർഡ് ഉടമകൾക്ക് അര ലീറ്ററും വീതം മണ്ണെണ്ണ അധികമായി നൽകാനാണ് ഭക്ഷ്യപൊതുവിതരണ വകുപ്പിന്റെ ഉത്തരവ്. ഓണം, ബക്രീദ് ഉത്സവകാലം കണക്കിലെടുത്താണ് അധിക മണ്ണെണ്ണ നൽകുന്നത്. 

കേന്ദ്ര വിഹിതം കുറവായതിനാൽ നിലവിൽ മൂന്ന് മാസത്തിലൊരിക്കലാണു മണ്ണെണ്ണ വിതരണം. കഴിഞ്ഞ വർഷം സെപ്റ്റംബറിൽ കേന്ദ്രത്തിൽ‌ നിന്നു ലഭിച്ച മണ്ണെണ്ണയിൽ 1,44,851 ലീറ്റർ കോട്ടയം ജില്ലയിലെ റേഷൻ കടകളിലുള്ളതും കേന്ദ്രം നേരത്തേ അനുവദിച്ചതിൽ 1,00,44 കിലോ ലീറ്റർ മണ്ണെണ്ണ നീക്കിയിരിപ്പുള്ളതും കണക്കിലെടുത്താണ് ഈ മാസം കൂടുതൽ വിതരണം ചെയ്യുന്നത്.