അറ്റകുറ്റപ്പണികൾ പൂർത്തിയായി; ചാലക്കുടിപ്പുഴയിലെ പഴയ പാലം ഇന്ന് തുറക്കും

തൃശൂർ : അറ്റകുറ്റപ്പണികൾ പൂർത്തിയായതോടെ ചാലക്കുടിപ്പുഴയിലെ പഴയ പാലം ഇന്ന് ​ഗതാ​ഗതത്തിനായി തുറക്കും. മൂന്നാഴ്ചയിലേറെയായി പാലം അടച്ചിട്ടിരിക്കുകയായിരുന്നു. ബുധനാഴ്ച രാവിലെ 10 മണിയോടെ തുറക്കുമെന്നാണ് അധികൃതർ അറിയിച്ചിട്ടുള്ളത്.

പണികളെല്ലാം പൂർത്തിയാക്കിയതോടെയാണ് തുറന്നു നൽകുന്നത്. രാവിലെ നിർമാണത്തിനുപയോഗിച്ച സാധനങ്ങളുടെ അവശിഷ്ടങ്ങളും മറ്റു തടസ്സങ്ങളും പാലത്തിൽ നിന്നും മാറ്റും. തുടർന്നാണ് പാലം തുറക്കുക.

തൂണുകൾക്കിടയിലെ ബെയറിങ് മാറ്റൽ, എക്സ്പാൻഷൻ ജോയിന്റുകൾ നേരെയാക്കൽ തുടങ്ങിയ ജോലികൾക്കായാണ് പാലം അടച്ചത്. ചായം പൂശലും പൂർത്തിയായി. മേയ് ഒൻപതു മുതലാണ് പാലം അറ്റകുറ്റപ്പണികൾക്കായി അടച്ചിട്ടത്.

20 ദിവസത്തിനുള്ളിൽ പൂർത്തിയാക്കുമെന്നായിരുന്നു നേരത്തെ അറിയിച്ചിരുന്നത്. അതുപ്രകാരം 29-ന് പൂർത്തിയാക്കേണ്ടതായിരുന്നു. എന്നാൽ അറ്റകുറ്റപ്പണികൾ നീണ്ടുപോയതിനാൽ പാലം തുറക്കുന്നത് ജൂൺ മൂന്നിലേക്ക് നീണ്ടു പോകുകയായിരുന്നു.