ജി സുധാകരന്റെ കൂട്ടുകെട്ട് ജമാഅത്തെ ഇസ്ലാമിയുമായി, വര്‍ഗീയതയെക്കുറിച്ച് സംസാരിക്കാന്‍ എന്തവകാശമെന്ന് എം വി ഗോവിന്ദന്‍

ആലപ്പുഴ: സിപിഎം മുന്‍ നേതാവ് ജി സുധാകരനെതിരെ കടുത്ത വിമര്‍ശനവുമായി പാര്‍ട്ടി സംസ്ഥാന സെക്രട്ടറി എം വി ഗോവിന്ദന്‍. സുധാകരന്റെ പൂര്‍വ്വകാല രാഷ്ട്രീയ ചരിത്രവുമായി ഇന്നത്തെ അദ്ദേഹത്തിന്റെ നിലപാടുകള്‍ക്ക് യാതൊരു ബന്ധവുമില്ലെന്ന് ഗോവിന്ദന്‍ പറഞ്ഞു. പറയാന്‍ മറ്റൊന്നും ഇല്ലാത്തതുകൊണ്ടാണ് സുധാകരന്‍ ഇപ്പോള്‍ സിപിഎം നേതാക്കളെ ആക്ഷേപിക്കുന്നതെന്നും അദ്ദേഹം പറഞ്ഞു.

ജി സുധാകരന്‍ പൂര്‍ണമായും കമ്മ്യൂണിസ്റ്റ് വിരുദ്ധമായ നിലപാടുകളാണ് സ്വീകരിക്കുന്നതെന്നും എം വി ഗോവിന്ദന്‍ കുറ്റപ്പെടുത്തി. യുഡിഎഫിനെ പിന്തുണയ്ക്കുന്ന ജമാഅത്തെ ഇസ്ലാമിയുമായാണ് സുധാകരന്‍ ഇപ്പോള്‍ ചങ്ങാത്തം കൂടുന്നതെന്നും എം വി ഗോവിന്ദന്‍ വിമര്‍ശിച്ചു.

വര്‍ഗ്ഗീയതയെക്കുറിച്ച് സംസാരിക്കാന്‍ അദ്ദേഹത്തിന് യാതൊരു അവകാശവുമില്ല. യുഡിഎഫിന്റെ പ്രധാന സഖ്യകക്ഷിയായ ജമാഅത്തെ ഇസ്ലാമിയാണ് അദ്ദേഹത്തിന് പിന്തുണ നല്‍കുന്നതെന്നും അദ്ദേഹം പരിഹസിച്ചു. സുധാകരനുമായി ഒരു തരത്തിലുള്ള വര്‍ത്തമാനത്തിനും താനില്ലെന്നും അദ്ദേഹത്തെ പിന്തുണയ്ക്കുന്നത് യുഡിഎഫ് വിഭാഗമാണെന്നും അദ്ദേഹം ആവര്‍ത്തിച്ചു.