ഇന്നും തീവ്രമഴ മുന്നറിയിപ്പ്, മഴക്കെടുതിയിൽ 9 മരണം, എഷ്യൻ ​ഗെയിംസിൽ ഇന്ത്യക്ക് മൂന്നാം വെള്ളി; ഇന്നത്തെ 5 പ്രധാന വാർത്തകൾ

സംസ്ഥാനത്ത് മഴക്കെടുതിയില്‍ 9 മരണം ആയി. മലപ്പുറത്ത് മലവെള്ളപ്പാച്ചിലില്‍ മരണം അഞ്ചായി. മൂന്നു മൃതദേഹങ്ങൾ കൂടി ഇന്ന് കണ്ടെടുത്തു. എഷ്യൻ ​ഗെയിംസിൽ എയർ റൈഫിൾസ് ഇനത്തിൽ ഇന്ത്യക്ക് മൂന്നാം വെള്ളി. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

മലപ്പുറം ചോക്കാട് പൂക്കോട്ടുപാടം ടി കെ നഗറിലുണ്ടായ മലവെള്ളപ്പാച്ചിലില്‍ കാണാതായ മൂന്നുപേരുടെ മൃതദേഹം കൂടി കണ്ടെടുത്തു. ഇതോടെ മരണം അഞ്ചായി. സംസ്ഥാനത്ത് കോട്ടയം, ഇടുക്കി, മലപ്പുറം ജില്ലകളിലുണ്ടായ വിവിധ മഴക്കെടുതികളില്‍ മരണം ഒമ്പതായി ഉയര്‍ന്നു. മണ്ണിടിച്ചിലിന്റെ സാഹചര്യത്തില്‍ ഇടുക്കിയില്‍ മലയോര മേഖലയില്‍ രാത്രികാല യാത്രാ നിരോധനം ഏര്‍പ്പെടുത്തി.

സംസ്ഥാനത്ത് ഇന്നും തീവ്രമഴയ്ക്ക് സാധ്യതയെന്ന് കാലാവസ്ഥ വകുപ്പിന്റെ മുന്നറിയിപ്പ്. കേരളത്തിലെ ആറു ജില്ലകളില്‍ ഓറഞ്ച് അലര്‍ട്ട് പുറപ്പെടുവിച്ചു. കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം ജില്ലകളിലാണ്, തീവ്രമഴ ജാഗ്രതാ നിര്‍ദേശം പുറപ്പെടുവിച്ചിട്ടുള്ളത്. ഒറ്റപ്പെട്ടയിടങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. 

സന്നിധാനത്ത് അരവണ ക്ഷാമം രൂക്ഷമായതോടെ വിതരണത്തില്‍ നിയന്ത്രണം. ഒരാള്‍ക്ക് ഒരു ടിൻ അരവണയും മൂന്ന് കവര്‍ അപ്പവുമാണ് ഞായറാഴ്ച വിതരണം ചെയ്തത്. അരവണ പ്ലാന്റില്‍ നവീകരണം നടക്കുന്നതിനാല്‍ ഉത്പാദനം താത്കാലികമായി നിര്‍ത്തിവച്ചതാണ് ക്ഷാമത്തിന് കാരണം. അരവണയുടെ കരുതല്‍ ശേഖരം തീരുന്ന മുറയ്ക്ക് വില്‍പ്പനയും നിര്‍ത്തിവയ്ക്കും.

ടാറ്റാ സണ്‍സ് ചെയര്‍മാനായി എന്‍ ചന്ദ്രശേഖരനെ വീണ്ടും നിയമിച്ചതില്‍ തര്‍ക്കം രൂക്ഷമാകുന്നു. ചന്ദ്രശേഖരന്റെ നിയമനത്തിനെതിരെ ടാറ്റാ ട്രസ്റ്റ് രംഗത്തെത്തി. ടാറ്റാ സണ്‍സിന്റെ നിര്‍ണായക ഓഹരി ഉടമകളായ ടാറ്റാ ട്രസ്റ്റിന്റെ പിന്തുണയില്ലാതെ കൈക്കൊണ്ട തീരുമാനം കമ്പനിയുടെ ഭരണഘടനാ ചട്ടങ്ങള്‍ക്ക് വിരുദ്ധമാണെന്നാണ് ട്രസ്റ്റിന്റെ വാദം. ബോര്‍ഡ് യോഗത്തിലെ പ്രമേയം നിയമപരമായി നിലനില്‍ക്കില്ലെന്നും അസാധുവാണെന്നും ടാറ്റാ ട്രസ്റ്റ് പറയുന്നു. 

ഏഷ്യന്‍ ഗെയിംസില്‍ ഇന്ത്യക്ക് മൂന്നാം വെള്ളി മെഡല്‍. വനിതകള്‍ക്ക് പിന്നാലെ പുരുഷന്‍മാരും 10 മീറ്റര്‍ എയര്‍ റൈഫിള്‍ വിഭാഗം ടീം ഇനത്തില്‍ വെള്ളി വെടിവച്ചിട്ടു. രുദ്രാംശ് പാട്ടീല്‍, ഹിമാന്‍ഷു ധില്ലന്‍, പാര്‍ഥ് രാകേഷ് മാനെ എന്നിവരടങ്ങിയ ടീമാണ് വെള്ളി സ്വന്തമാക്കിയത്. 1890.1 പോയിന്റ് നേടിയാണ് ഇന്ത്യയുടെ മെഡല്‍ നേട്ടം. രുദ്രാംശ് 631.8 പോയിന്റും ഹിമാൻഷു 630.0 പോയിന്റും പാർഥ് 628.3 പോയിന്റും വെടിവച്ചാണ് ഇന്ത്യക്ക് വെള്ളി സമ്മാനിച്ചത്.