രാത്രിയില്‍ ഉഗ്രശബ്ദം; ഒന്നും മനസിലാകാതെ നാട്ടുകാര്‍; പുലര്‍ച്ചെ കണ്ടത് കൂറ്റന്‍ പാറക്കല്ല്

കോഴിക്കോട്: കല്ലാനോട് ശക്തമായി പെയ്ത മഴയില്‍ മലയില്‍ നിന്ന് കൂറ്റന്‍ കല്ല് അടര്‍ന്നുവീണു. ഉഗ്രശബ്ദത്തോടെയാണ് കൂറ്റന്‍ പാറക്കല്ല് വീടുകള്‍ക്ക് സമീപത്തേക്ക് പതിച്ചത്. ഏഴുകുടുംബങ്ങളെ മാറ്റിപാര്‍പ്പിച്ചു

ഇന്നലെ രാത്രി പതിനൊന്നരയോടെയാണ് കൂരാച്ചുണ്ട് പഞ്ചായത്തിലെ കല്ലാനോട് ഇല്ലിപ്പിലായി മേഖലയില്‍ കൂറ്റന്‍ ശബ്ദം കേട്ടത്. ശബ്ദം കേട്ടെങ്കിലും അതിന്റെ കാരണം ആര്‍ക്കും മനസിലായിരുന്നില്ല. ഇന്ന് രാവിലെയാണ് വീടുകള്‍ക്ക് സമീപത്ത് കൂറ്റന്‍ പാറക്കല്ല് അടര്‍ന്ന് എത്തിയതായി കണ്ടെത്തിയത്.

ശബ്ദം കേട്ടതിന് പിന്നാലെ തന്നെ പൂത്തോട്ട് താഴെ തോടിനോട് ചേര്‍ന്ന മേഖലയില്‍ വീടുകളിലെ ആളുകളെ മാറ്റി താമസിപ്പിച്ചു. മുന്‍പ് മലയിടിച്ചിലില്‍ ഭൂമിക്കു വിള്ളല്‍ സംഭവിച്ച മേഖലയാണിത്. ജനപ്രതിനിധികള്‍ അടക്കം സംഭവസ്ഥലത്തെത്തി പ്രദേശവാസികള്‍ക്ക് ജാഗ്രത നിര്‍ദേശം നല്‍കി.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ഇന്നലെ രാവിലെ മുതല്‍ പ്രദേശത്ത് ശക്തമായ മഴയാണ് പെയ്തത്. ഇന്ന് മഴയ്ക്ക് അല്‍പം ശമനമുണ്ടെങ്കിലും മഴ കനത്താല്‍ പാറക്കല്ല് വീടിന് മുകളില്‍ പതിക്കുമോയെന്ന ആശങ്കയിലാണ് വീട്ടുകാര്‍.