ഇന്ന് 'ഇരുട്ടത്ത് ഇരിക്കേണ്ട'; രാത്രിയില്‍ പവര്‍ കട്ട് ഉണ്ടായേക്കില്ല

തിരുവനന്തപുരം: ജനങ്ങള്‍ക്ക് ആശ്വാസമായി സംസ്ഥാനത്ത് ഇന്ന് രാത്രിയില്‍ പവര്‍ കട്ട് ഉണ്ടായേക്കില്ല. റിയല്‍ ടൈം മാര്‍ക്കറ്റില്‍ നിന്ന് 1024 മെഗാവാട്ട് വൈദ്യുതി ലഭിച്ചതിനാല്‍ ഇന്ന് രാത്രിയില്‍ പവര്‍ കട്ട് ഉണ്ടായേക്കില്ലെന്ന് വൈദ്യുതി വകുപ്പ് മന്ത്രിയുടെ ഓഫീസ് അറിയിച്ചു.

കഴിഞ്ഞ ഏതാനും ദിവസങ്ങളായി സംസ്ഥാനത്ത് പ്രതിദിനം 900 മെഗാവാട്ട് മുതല്‍ ആയിരം മെഗാവാട്ട് വരെ വൈദ്യുതിയുടെ കുറവാണ് ഉണ്ടായത്. എന്നാല്‍ അവധി ദിവസമായ ഇന്ന് തത്സമയ വിപണിയില്‍ നിന്ന് ആവശ്യമായ വൈദ്യുതി ലഭിച്ചു എന്നാണ് വൈദ്യുതി വകുപ്പ് മന്ത്രിയുടെ ഓഫീസ് അറിയിച്ചത്. ഇതോടെ ഇന്ന് രാത്രി പവര്‍ കട്ടില്ലാതെ അവധി ദിനം ചെലവഴിക്കാന്‍ കുടുംബങ്ങള്‍ക്ക് സാധിക്കുന്നത് ആശ്വാസമാകും.