എല്‍ഡിഎഫ് നേതൃയോഗം ഇന്ന് ; തദ്ദേശ തെരഞ്ഞെടുപ്പ് മുഖ്യ അജന്‍ഡ ; ജോസ് കെ മാണി ആദ്യമായി മുന്നണി യോഗത്തില്‍

തിരുവനന്തപുരം : ഇടതു മുന്നണി നേതൃയോഗം ഇന്ന് തിരുവനന്തപുരത്ത് ചേരും. തദ്ദേശ തെരഞ്ഞെടുപ്പാണ് യോഗത്തിന്റെ പ്രധാന അജന്‍ഡ. സീറ്റ് വിഭജനം, സ്ഥാനാര്‍ത്ഥി നിര്‍ണയം, പ്രകടന പത്രിക തുടങ്ങിയവയെല്ലാം യോഗം ചര്‍ച്ച ചെയ്യും. 

മുന്നണിയിലെത്തിയ ശേഷം കേരള കോണ്‍ഗ്രസ് ജോസ് കെ മാണി വിഭാഗം ആദ്യമായി പങ്കെടുക്കുന്ന എല്‍ഡിഎഫ് യോഗമെന്ന പ്രത്യേകതയും ഉണ്ട്. ജോസ് കെ മാണിക്കൊപ്പം ആരാകും യോഗത്തിനെത്തുക എന്നത് സംബന്ധിച്ച് വ്യക്തതയില്ല. 

സ്വര്‍ണക്കടത്തു വിഷയവും ബിനീഷ് കോടിയേരി വിഷയവും യോഗത്തില്‍ ചര്‍ച്ചയായേക്കും. സര്‍ക്കാരിനെ പ്രതിരോധിക്കുന്നതിനുള്ള തന്ത്രങ്ങള്‍ക്കും യോഗം രൂപം നല്‍കിയേക്കും.