കോഴിക്കോട് തോക്കുമായി മാവോയിസ്റ്റുകൾ; സംഘത്തിൽ നാല് സ്ത്രീകൾ; തിരച്ചിൽ

കോഴിക്കോട്: പശുക്കടവിൽ ആറ് പേരടങ്ങിയ മാവോയിസ്റ്റ് സംഘമെത്തി. തിങ്കളാഴ്ച വൈകീട്ടോടെയാണ് പാമ്പൻകോട് മലയിൽ എം സണ്ണി, എംസി അശോകൻ എന്നിവരുടെ വീടുകളിൽ ഇവർ എത്തിയത്. സംഘത്തിൽ നാല് സ്ത്രീകളും രണ്ട് പുരുഷൻമാരും ഉണ്ടായിരുന്നു. അശോകന്റെ വീട്ടിൽ നിന്ന് ഭക്ഷണം കഴിച്ച ശേഷം പാഴ്സൽ വാങ്ങിയാണു ഇവർ മടങ്ങിയത്. 

സംഘത്തിലെ ഒരാൾ തോക്കുമായി റോഡിൽ നിന്നു. മറ്റുള്ളവർ വീടുകളിൽ കയറി സംസാരിച്ചു. മലയാളത്തിലാണ് സംസാരിച്ചതെന്ന് വീട്ടുകാർ പറഞ്ഞു. ആറ് പേരുടെയും പക്കൽ തോക്കുണ്ടായിരുന്നെന്നും കാർഷിക മേഖലയുമയി ബന്ധപ്പെട്ട കാര്യങ്ങളാണ് ചോദിച്ചതെന്നും വീട്ടുകാർ പറഞ്ഞു.

ആദ്യമായാണ് മാവോയിസ്റ്റ് സംഘം ഇവിടെ എത്തുന്നത്. വിവരം അറിഞ്ഞ് നാദാപുരം ഡിവൈഎസ്പിയുടെ നേതൃത്വത്തിൽ തണ്ടർബോൾട്ടും പൊലീസും പ്രദേശത്ത് തിരച്ചിൽ നടത്തി. കഴിഞ്ഞ വർഷം വട്ടിപ്പന പൊയിലോംചാൽ മേഖലയിൽ മാവോയിസ്റ്റ് സംഘം എത്തിയിരുന്നു.