കോട്ടയത്തു നിന്ന് കാണാതായ വിദ്യാര്‍ത്ഥികളെ കണ്ടെത്തി

കോട്ടയം; കോട്ടയം കാണക്കാരിയില്‍നിന്ന് കാണാതായ നാല് വിദ്യാര്‍ത്ഥികളെ കണ്ടെത്തി. കാണക്കാരി ഗവണ്‍മെന്റ് സ്‌കൂളിലെ ഒമ്പതാം ക്ലാസ് വിദ്യാര്‍ഥികളാണ് നാടിനെ ആശങ്കയിലാക്കിയത്. പൊലീസ് നടത്തിയ തെരച്ചിലിലാണ് നാല്‍വര്‍ സംഘത്തെ കണ്ടെത്തിയത്. 

കാണാതായ വിദ്യാര്‍ഥികളില്‍ ഒരാള്‍ക്ക് മൊബൈല്‍ ഫോണ്‍ ഉണ്ടായിരുന്നു. ഈ ഫോണിന്റെ ടവര്‍ ലൊക്കേഷന്‍ കേന്ദ്രീകരിച്ച് പോലീസ് അന്വേഷണം നടത്തുകയായിരുന്നു. തുടര്‍ന്ന് അറവുകാട് ക്ഷേത്രപരിസരത്തുനിന്ന് അര്‍ത്തുങ്കല്‍ പോലീസാണ് വിദ്യാര്‍ഥികളെ കണ്ടെത്തിയത്.

തിങ്കളാഴ്ച സ്‌കൂളില്‍ പരീക്ഷയ്ക്കുപോയ വിദ്യാര്‍ഥികള്‍ വീട്ടിലെത്താതിരുന്നതിനെ തുടര്‍ന്ന് വീട്ടുകാര്‍ അന്വേഷണം നടത്തിയെങ്കിലും കണ്ടെത്താനായില്ല. തുടര്‍ന്നാണ് പരാതിയുമായി പോലീസിനെ സമീപിച്ചത്.