കാസ‌ർകോട്‌: പെരിയ ഇരട്ടക്കൊലപാതക കേസിൽ ഒരാളെ കൂടി കസ്റ്റഡിയിൽ. കാസ‌ർകോട് എച്ചിലടുക്കം സ്വദേശി മുരളിയാണ് കസ്റ്റഡിയിലായത്. കേസിൽ ആരോപണ വിധേയനായ ശാസ്ത ​ഗം​ഗാധരന്റെ ഡ്രൈവ‌‌‌ർ ആണ് മുരളി. പ്രതികളെ രക്ഷപ്പെടാൻ സഹായിച്ചത് മുരളിയാണെന്ന് അന്വേഷണ സംഘം സംശയിക്കുന്നു. കൊല നടത്തിയ ശേഷം പ്രതികളെ മുരളി വാഹനത്തിൽ രക്ഷപ്പെടുകയായിരുന്നു എന്നാണ് നി​ഗമനം. ഇയാളുടെ അറസ്റ്റ് നാളെ രേഖപ്പെടുത്തിയേക്കും. 

ഫെബ്രുവരി പതിനേഴിന് രാത്രി എട്ട് മണിയോടെയാണ് യൂത്ത് കോൺഗ്രസ് പ്രവർത്തകരായ കൃപേഷും ശരത് ലാലും കൊല്ലപ്പെട്ടത്. 
നേരത്തെ കേസിൽ ഏഴ് പേ‌ർ അറസ്റ്റിലായിരുന്നു. സിപിഎം മുൻ ലോക്കൽ കമ്മിറ്റിയം​ഗം എ പീതാംബരനാണ് കേസിലെ ഒന്നാം പ്രതി. കേസന്വേഷണം സിബിഐക്ക് കൈമാറണമെന്ന ആവശ്യം നിലനിൽക്കെയാണ് ഒരാൾ കൂടി കസ്റ്റഡിയിലാകുന്നത്.