ഇസ്ലാമാബാദ്: പാകിസ്ഥാന്‍ വിദേശകാര്യ മന്ത്രി ഇസ്ഹാഖ് ദറിന് വാഷിങ്ടണ്‍ വിമാനത്താവളത്തില്‍ ശകാര വര്‍ഷം. വിമാനത്താവളത്തില്‍ ഒരാള്‍ മന്ത്രിയെ അസഭ്യവര്‍ഷത്തില്‍ മുക്കുന്നതിന്റെ വിഡിയോ സാമൂഹ്യ മാധ്യമങ്ങളില്‍ വ്യാപകമായി പ്രചരിക്കുകയാണ്. ആരാണ് ഇയാളെന്നു വ്യക്തമല്ല.

രാജ്യാന്തര നാണ്യ നിധി (ഐഎംഎഫ്) യോഗത്തില്‍ പങ്കെടുക്കാനാണ് ഇസ്ഹാഖ് ദര്‍ വാഷിങ്ടണില്‍ എത്തിയത്. വിമാനത്താവളത്തില്‍ നിന്നു പുറത്തേക്കുള്ള ലോഞ്ചില്‍ വച്ച് ഒരാള്‍ ദറിനെ ചീത്ത വിളിക്കുന്നതാണ് ദൃശ്യങ്ങളില്‍ ഉള്ളത്.

ദറിന് ഒപ്പമുള്ള ഒരാള്‍ ഇതിനോടു പ്രതികരിക്കുന്നുണ്ട്. ഒപ്പമുള്ളയാള്‍ രൂക്ഷമായി പ്രതികരിച്ചതോടെ ശകാരിച്ചയാള്‍ പിന്‍വാങ്ങുകയാണ്.

മന്ത്രിയെ അപമാനിച്ചയാള്‍ ആരെന്നതിനെച്ചൊല്ലി സാമൂഹ്യ മാധ്യമങ്ങളില്‍ ചര്‍ച്ചകള്‍ കൊഴുക്കുകയാണ്. പാകിസ്ഥാനിലെ രാഷ്ട്രീയ പാര്‍ട്ടികളായ പിടിഐയുടെയും പിഎംഎലിന്റെയും അനുയായികള്‍ തമ്മിലാണ് വാക് പോര്.

ഈ വാര്‍ത്ത കൂടി വായിക്കൂ 

വില്യം രാജകുമാരന് 3,295 കോടി രൂപയുടെ വസ്തുവകകൾ സ്വന്തം; ഒപ്പം ഒരു ജയിലും! 

സമകാലിക മലയാളം ഇപ്പോള്‍ വാട്ടസ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ