വീടിനുള്ളിൽ സിംഹക്കുട്ടിയെ വളർത്തി, യുവാവ്  അറസ്റ്റിൽ

പാരീസ്: വീടിനുള്ളിൽ സിംഹക്കുട്ടിയെ വളർത്തിയ സംഭവത്തിൽ യുവാവ്  അറസ്റ്റിൽ. ഫ്രാൻസ് തലസ്ഥാനമായ പാരീസിലാണ് സംഭവം. സിംഹക്കുട്ടിയെ വിൽക്കാൻ ശ്രമിക്കുന്നതിനിടെയാണ് മുപ്പതുകാരനെ പൊലീസ് അറസ്റ്റ് ചെയ്തത്. 

സംഭവം അറിഞ്ഞ പൊലീസ് നടത്തിയ തിരച്ചിലിൽ വീടിനുള്ളിലെ കിടക്കയിൽ നിന്ന് സിംഹക്കുട്ടിയെ കണ്ടെടുത്തു. പൂർണ ആരോഗ്യവാനാണ് സിംഹക്കുട്ടിയെന്നും ഇതിനെ വന്യമൃഗ സംരക്ഷണ വിഭാഗത്തിന് കൈമാറിയെന്നും അധികൃതർ വ്യക്തമാക്കി. അറസ്റ്റിലായ യുവാവിന്‍റെ പേരു വിവരങ്ങൾ പുറത്ത് വിട്ടിട്ടില്ല. 

യുവാവ് മുൻപ് മോഷണക്കുറ്റങ്ങൾക്കടക്കം പലതവണ പിടിയിലായിട്ടുണ്ടെന്നും പോലീസ് വൃത്തങ്ങൾ അറിയിച്ചു. വീടിനുള്ളിൽ സിംഹക്കുട്ടിയെ വളർത്തുകയും അതിനൊപ്പം സെൽഫിയെടുത്ത് പ്രചരിപ്പിക്കുകയും ചെയ്തതിന് 2017ൽ പാരീസിൽ ഒരാളെ പൊലീസ് അറസ്റ്റ് ചെയ്തിരുന്നു.