സിംഗപ്പൂരിന്റെ ഇടക്കാല പ്രസിഡന്റായി ഇന്ത്യന്‍ വംശജന്‍

സിംഗപ്പൂരിന്റെ ഇടക്കാല പ്രസിഡന്റായി ഇന്ത്യന്‍ വംശജന്‍. സിവില്‍ സര്‍വന്റായ ജോസഫ് യുവരാജ പിള്ളയാണ് സിംഗപ്പൂരിന്റെ ഇടക്കാല പ്രസിഡന്റായി സ്ഥാനമേറ്റിരിക്കുന്നത്. 

അധികാരത്തില്‍ ആറ് വര്‍ഷം പൂര്‍ത്തിയാക്കിയ ടോണി താന്‍ കെങ് യാമില്‍ നിന്നാണ് പിള്ള അധികാരമേറ്റെടുത്തത്. സിംഗപ്പൂരിന്റെ പ്രസിഡന്‍ഷ്യല്‍ അഡൈ്വസേഴ്‌സിന്റെ ചെയര്‍മാനായിരുന്നു അദ്ദേഹം. 

സെപ്തംബര്‍ 23നാണ് പുതിയ പ്രസിഡന്റിനെ തെരഞ്ഞെടുക്കുന്നതിനുള്ള വോട്ടെടുപ്പ്. പ്രസിഡന്റ് പദവി ഒഴിഞ്ഞ് കിടക്കുമ്പോള്‍ പ്രസിഡന്റിന്റെ ചുമതല വഹിക്കേണ്ടത് പ്രസിഡന്‍ഷ്യല്‍ അഡൈ്വസേഴ്‌സ് ചെയര്‍മാനാണെന്നാണ് ചട്ടം. 1991ല്‍ പ്രസിഡന്റിനെ തെരഞ്ഞെടുപ്പിലൂടെ തെരഞ്ഞെടുക്കുന്ന സമ്പ്രദായം ആരംഭിച്ചതിന് ശേഷം ഇത് ആദ്യമായാണ് സിംഗപ്പൂരില്‍ പ്രസിഡന്റ് കസേര ഒഴിഞ്ഞു കിടക്കുന്നത്. 

നേരത്തെ സിംഗപ്പൂര്‍ പ്രസിഡന്റ് വിദേശ പര്യടനങ്ങള്‍ക്കായി പോകുമ്പോഴും പ്രസിഡന്റിന്റെ ചുമതലകള്‍ വഹിച്ചിരുന്നത് പിള്ളയായിരുന്നു.