കാണാനിഴലില്‍ നര്‍ത്തനമാടുന്നവള്‍

ഒറ്റച്ചിലമ്പുമായ് നര്‍ത്തനമാടാന്‍

തുടിക്കും മനസ്സിനെ കാണാച്ചരടില്‍

കുരുക്കിയതാരോ* വിഷാദത്തിരകളില്‍

മേലേക്കുയര്‍ത്തിയതാരോ, നിയതിയോ,

വര്‍ണ്ണം നിഷേധിച്ച കൈവിരലോ, നിലാ-

ത്തുമ്പികള്‍ പൂക്കുന്ന പൊന്‍തൂവലോ?

പൊന്നിന്‍ കുരുക്കഴിച്ചിന്നലെയാടിയ

നര്‍ത്തനം ശിഞ്ജിതം തീര്‍ക്കുന്ന വേളയില്‍

താളമേളങ്ങളാല്‍ രംഗം കൊഴുക്കുന്നു

അന്നേരമേതോ നിഴല്‍ വന്നു മൂടുന്നു,

ഒറ്റയാണൊറ്റയാണെന്നു മുഴക്കവേ

ഒറ്റ മുലച്ചിയെന്നര്‍ത്ഥം ചിതറിയോ?

കാണാച്ചരടാല്‍ കൊളുത്തിട്ടു കെട്ടിയി-

ട്ടഗ്‌നികുണ്ഡത്തില്‍ കുടഞ്ഞിട്ടു നെഞ്ചൂക്കു

കാട്ടിച്ചിരിച്ചവനാത്മരാഗത്തില്‍ രതി-

ഛായയില്‍ നിര്‍വൃതി തേടുന്ന വേളയില്‍

തീയാട്ടമാടിത്തിമിര്‍ക്കട്ടെയുച്ചിയില്‍

കാളിയനായി ഞാന്‍ സംഹാരമാടട്ടെ.

വര്‍ഷമേഘങ്ങളേ ദുന്ദുഭിയാര്‍ക്കുക

ഒറ്റയിലൊറ്റയായ് വിശ്വം നിറയുന്ന

ഉണ്മയിലെന്റെ വിഷാദത്തെയാഴ്ത്തുക,

ഒറ്റച്ചിലമ്പുമായൊറ്റമുലച്ചിയീ വേദിയില്‍

വര്‍ഷങ്ങളാടിത്തിമിര്‍ക്കവേ

ഉണ്മയിലെന്റെ വിമുക്തി ഭവിക്കട്ടെ.

*Narcissistic Abuse - ആത്മരതിയില്‍ വിരമിക്കുന്നവന്‍ ഇണയെ മാനസികമായി പീഡിപ്പിക്കുന്ന അവസ്ഥ