നിലത്ത് ചോരയില്‍ കുളിച്ചു കിടക്കുന്ന കൊല്ലപ്പെട്ട കാമുകിയെ നോക്കി അയാള്‍ പൊട്ടിക്കരഞ്ഞു.

കൊലയാളി അപ്പോഴും അയാളുടെ വീട്ടില്‍ തന്നെ ഉണ്ടായിരുന്നു.

പൊലീസ് ജീപ്പുകളുടെ സൈറണുകള്‍ അയാളുടെ ചെവിയില്‍ മുഴങ്ങി.

കൊലയാളിയെ പൊലീസിന് വിട്ടുകൊടുക്കുകയില്ലെന്ന് അയാള്‍ തീരുമാനിച്ചു.

അരയില്‍ ഒളിപ്പിച്ച തോക്ക് വീണ്ടും പുറത്തെടുത്തുകൊണ്ട് അയാള്‍ മുന്നോട്ട് നടന്നു.

***************

-

മുന്‍വശത്തെ വാതില്‍ തല്ലി പൊളിച്ചു പൊലീസ് വീട്ടിനുള്ളില്‍ പ്രവേശിച്ചപ്പോള്‍ അയാള്‍ കൊലയാളിയുടെ നെറ്റിയില്‍ തോക്ക് ചൂണ്ടി നില്‍ക്കുകയായിരുന്നു.

'Drop your guns! പൊലീസുകാരെ നോക്കി അയാള്‍ അലറി.

പൊലീസുകാര്‍ പതിയെ തോക്കുകള്‍ താഴെ വെച്ചു.

'നോ! ചെയ്യരുത്!' ഏറ്റവും മുന്നില്‍ നിന്ന പ്രധാന പൊലീസുകാരന്‍ അയാളോട് അപേക്ഷിച്ചു.

അയാള്‍ അതൊന്നും കേള്‍ക്കുന്നുണ്ടായിരുന്നില്ല.

കൊലയാളിയെ നിയമത്തിന് വിട്ടുകൊടുക്കുകയില്ലെന്ന് അയാള്‍ തീര്‍ച്ചപ്പെടുത്തിയിരുന്നു.

കൊലയാളിയുടെ വായിലേക്ക് അയാള്‍ തോക്കിന്റെ ബാരല്‍ തിരുകി.

പൊലീസുകാര്‍ നിസ്സഹായരായി നോക്കി നിന്നു.

അയാള്‍ കാഞ്ചി വലിച്ചു.

ചെവി തുളയ്ക്കുന്ന വെടി ശബ്ദം മുറിയില്‍ പ്രതിധ്വനിച്ചു.

പൊലീസുകാര്‍ അയാളുടെ നേരെ പാഞ്ഞടുത്തു.

പൊട്ടി തെറിച്ച തലച്ചോറുമായി അയാള്‍ കാമുകിയുടെ അടുത്തേക്ക് മറിഞ്ഞു വീണു.