മെല്‍ബണ്‍ : മെൽബണിൽ നടക്കുന്ന ബോക്സിം​ഗ് ഡേ ക്രിക്കറ്റ് ടെസ്റ്റില്‍ അരങ്ങേറിയതോടെ ഇന്ത്യയുടെ പുതിയ ഓപ്പണര്‍ മായങ്ക് അഗര്‍വാളിനെത്തേടി ആ ഭാഗ്യവുമെത്തി. വിഖ്യാതമായ മെല്‍ബൺ ക്രിക്കറ്റ് ​ഗ്രൗണ്ടില്‍ അരങ്ങേറുന്ന ആദ്യ ഇന്ത്യന്‍ ഓപ്പണറെന്ന നേട്ടമാണ് മായങ്കിനെ തേടിയെത്തിയത്. ഇന്ത്യക്ക് വേണ്ടി അരങ്ങേറുന്ന 295ാമത്തെ കളിക്കാരനാണ് മായങ്ക് അഗര്‍വാള്‍. 

പക്ഷേ ആസ്‌ട്രേലിയന്‍ മണ്ണില്‍ അരങ്ങേറുന്ന ആദ്യ ഇന്ത്യക്കാരനെന്ന നേട്ടം മറ്റൊരു താരത്തിന്റെ പേരിലാണ്. 1947-48 കാലത്ത് സിഡ്‌നി ക്രിക്കറ്റ് ടെസ്റ്റില്‍ ഇന്ത്യക്കായി അരങ്ങേറിയ ആമിര്‍ ഇലാഹിയുടെ പേരിലാണ് ആ നേട്ടം. അന്ന് ഇലാഹി ഇന്ത്യക്കുവേണ്ടി അരങ്ങേറുന്ന 40ാമത്തെ താരമായിരുന്നു. 

പരമ്പരയിൽ വൻ ദുരന്തമായി മാറിയ് ഓപ്പണിം​ഗ് ജോഡി മുരളി വിജയ് - ലോകേഷ് രാഹുൽ ടീമിനെ പുറത്തിരുത്തിയാണ് മായങ്കിനെ പരീക്ഷിക്കാൻ ടീം മാനേജ്മെന്റ് തീരുമാനിച്ചത്. കർണാടക താരമാണ് 27 കാരനായ മായങ്ക്. ഓൾറൗണ്ടർ ഹനുമ വിഹാരിയാണ് മായങ്കിനൊപ്പം ഇന്നിം​ഗ്സ് ഓപ്പൺ ചെയ്തത്. വിഹാരിയെ ഓപ്പണറാക്കിയതോടെ, രോഹിത് ശർമ്മയെയും ടീമിലുൾപ്പെടുത്തി ബാറ്റിം​ഗ് ശക്തിപ്പെടുത്താനും ഇന്ത്യയ്ക്കായി.