'എത്രകാലം അവൻ അപമാനം സഹിക്കും': പൊട്ടിത്തെറിച്ച് അശ്വിന്റെ അച്ഛൻ; വെറുതെ വിടണമെന്ന് താരം

ചെന്നൈ: ഇന്ത്യൻ ക്രിക്കറ്റ് താരം ആർ അശ്വിന്റെ അപ്രതീക്ഷിത വിരമിക്കൽ ക്രിക്കറ്റ്പ്രേമികളെ ഒന്നാകെ ഞെട്ടിച്ചിരിക്കുകയാണ്. പിന്നാലെ അശ്വിന്റെ വിരമിക്കലിൽ ഞെട്ടിക്കുന്ന പ്രസ്താവനയുമായി പിതാവ് രവിചന്ദ്രൻ രം​ഗത്തെത്തി. മകൻ ടീമിൽ അപമാനിക്കപ്പെട്ടുകൊണ്ടിരിക്കുകയാണ് എന്നായിരുന്നു അദ്ദേഹം പറഞ്ഞത്. രവിചന്ദ്രന്റെ വാക്കുകൾ വലിയ ചർച്ചയായതോടെ വിശദീകരണവുമായി അശ്വിൻ തന്നെ രം​ഗത്തെത്തി.

‘വിരമിക്കൽ എന്നത് അശ്വിന്റെ സ്വന്തം തീരുമാനമാണ്. ഞാൻ അതിൽ ഇടപെടില്ല. എന്നാൽ അദ്ദേഹം അങ്ങനെയൊരു തീരുമാനമെടുത്തതിൽ പല കാരണങ്ങളും ഉണ്ടായിരിക്കാം. ചിലപ്പോൾ അദ്ദേഹം അപമാനിതനായിട്ടുണ്ടാകും. 14–15 വർഷത്തോളമായി അശ്വിന്‍ ക്രിക്കറ്റിലുണ്ട്. അതുകൊണ്ടു തന്നെ ഇത് കുടുംബത്തിന് ഒരു വൈകാരിക നിമിഷമാണ്. പെട്ടെന്നുണ്ടായ ഈ മാറ്റത്തിലുള്ള ഞെട്ടൽ കുടുംബത്തിലുണ്ട്. ഒരു തരത്തിൽ പറഞ്ഞാല്‍ ഈ തീരുമാനം പ്രതീക്ഷിച്ചിരുന്നു. കാരണം അവൻ അപമാനിക്കപ്പെട്ടുകൊണ്ടിരിക്കുകയാണ്. എത്ര കാലം അദ്ദേഹത്തിന് ഇത് സഹിക്കാൻ സാധിക്കും?- രവിചന്ദ്രൻ പറഞ്ഞു.

പിതാവിന്റെ ആരോപണം വൻ ചർച്ചയായതോടെയാണ് വിശദീകരണവുമായി അശ്വിൻ രം​ഗത്തെത്തിയത്. മാധ്യമങ്ങളുമായി അത്ര പരിചയമില്ലാത്ത വ്യക്തിയാണ് എന്റെ അച്ഛൻ. നിങ്ങൾ അച്ഛന്റെ പ്രസ്താവന തേടിപ്പോകുന്ന പാരമ്പര്യം പിന്തുടരുമെന്ന് ഞാൻ വിചാരിച്ചില്ല. അദ്ദേഹത്തോട് ക്ഷമിക്കണമെന്നും അച്ഛനെ വെറുതെ വിടണമെന്നും ഞാൻ അഭ്യർത്ഥിക്കുകയാണ്.- അശ്വിൻ എക്സിൽ കുറിച്ചു.