​ഗോൾ നേട്ടത്തിൽ റെക്കോർഡിട്ട് ഛേത്രി; പക്ഷേ, ബം​ഗളൂരു വീണു; വിജയം പിടിച്ച് ഹൈദരാബാദ്

പനാജി: ഐഎസ്എല്ലിൽ കരുത്തരായ ബം​ഗളൂരു എഫ്സിയെ തകർത്ത് ഹൈദരാബാദ് എഫ്സി. ജയത്തോടെ പ്ലേയോഫിൽ സ്ഥാനമുറപ്പിക്കാനുള്ള അവസരവും അവർ സജീവമാക്കി. ഒന്നിനെതിരെ രണ്ട് ​ഗോളുകൾക്കാണ് ഹൈദരാബാദിന്റെ ജയം. 

മത്സരത്തിന്റെ ആദ്യ പകുതിയിൽ തന്നെ രണ്ട് ​ഗോളുകൾ വലയിലാക്കി ഹൈദരാബാദ് കളിയിൽ മുൻതൂക്കം നേടി. 16ാം മിനിറ്റിൽ ജാവിയർ സിവെറിയോയും 30ാം മിനിറ്റിൽ ജാവോ വിക്ടറുമാണ് ഹൈദരാബാദിന്റെ ഗോളുകൾ നേടിയത്. 

87ാം മിനിറ്റിൽ ബം​ഗളൂരു ആശ്വാസ ​ഗോൾ നേടി. സുനിൽ ഛേത്രിയാണ് വല ചലിപ്പിച്ചത്. ഐഎസ്എല്ലിൽ ഛേത്രിയുടെ 50ാം ഗോളായിരുന്നു ഇത്. ഐഎസ്എല്ലിന്റെ ചരിത്രത്തിൽ ഏറ്റവും കൂടുതൽ ​ഗോൾ നേടുന്ന താരമായി ഇതോടെ ഛേത്രി മാറി. മുൻ ബ്ലാസ്റ്റേഴ്സ് താരം ബർതലോമ്യു ഒ​ഗ്ബച്ചയെ മറികടന്നാണ് ഛേത്രി റെക്കോർഡിട്ടത്.

സമനില ഗോളിനായി ബംഗളൂരു ശ്രമിച്ചെങ്കിലും ഹൈദരാബാദ് പ്രതിരോധം ഉറച്ചു നിന്നതോടെ ആ മോഹം പൊലിഞ്ഞു. 

ജയത്തോടെ 16 മത്സരങ്ങളിൽ നിന്ന് 29 പോയിന്റുമായി ഹൈദരാബാദ് പട്ടികയിൽ ഒന്നാം സ്ഥാനത്ത് തുടരുന്നു. 23 പോയിന്റുള്ള ബംഗളൂരു മൂന്നാം സ്ഥാനത്ത് നിൽക്കുന്നു.